Editoryal: Grasya sa Carmen

Dakong grasya ang nadawat sa lungsod sa Carmen human sa 50 ka tuig nga pagpahigayon sa Sinulog festival, ang kulturanhong bahin sa kapistahan ni Sr. Sto. Niño de Cebu, kagahapon, Enero 22, 2023.

Wa seguro magdahom ang mga Carmenanon nga nahimong engrande ang ilang kalihokan ning tuiga human sa ginagmay ug hilom lang nga pagpahigayon niini sa dugay nang panahon.

Kini tungod sa pag-apil sa napulo ka mga contingent gikan sa ubang bahin sa lalawigan sa Sugbo ubos sa pagpangulo ni Gobenador Gwendolyn ‘Gwen’ Garcia, kinsa nisayaw uban sa Sarok Festival sa lungsod sa Consolacion.

Mao kini ang grupo nga nisibog sa ilang pag-apil sa 43rd Sinulog sa Dakbayan sa Sugbo nga gipahigayon sa unang higayon sa South Road Properties (SRP) tungod sa kaapiki sa pagpangandam sa pasilidad.

Sa kinatibuk-an, dunay kapin sa 20 ka contingents ang ning-apil sa Sinulog sa Carmen diin nag-trending sa traditional ug social media posts hinungdan nga nabaniog ang lungsod sa sulod ug gawas sa nasod.

Si Mayor Carlo Mariano T. Villamor nihangop sa mga dumuduong, contingents ug mga opisyal gikan sa ubang local government units (LGUs).

Usa kini sa maayong kalamboan nga nagpakita nga dunay ubang dapit nga naghimo usab og festival alang ni Sr. Sto. Niño, dili lang kini sa dakbayan sa Sugbo, Manila ug Ati-Atihan sa Kalibo, Aklan nga sikat na kaayo.

Bisan ang Sinulog sa Carmen nahunong kadali pasado alas 3:00 sa hapon tungod sa kalit nga pagbunok sa uwan apan giisip kini nga bendisyon human wala kini magdugay ug nibalik ang mga presentasyon.

Hinaut nga mosunod ang dugang kalamboan sa ekonomiya gikan sa pagka 3rd class municipality ngadto sa mas taas pa nga klasipikasyon sa LGU.

Mag-ampo kita sa Balaang Bata sa Sugbo ang pagkabaniog sa Sinulog sa Carmen mas mopalapad sa kahiusahan ug dili hinungdan sa pagkabahinbahin.

Pit Senyor!