Dunay ordinansahon nga giduso si Konsehal Jose Lorenzo Abellanosa nga “Anti-Violence and School Safety Ordinance” nga magmando sa mga tunghaan sa Cebu City pagduso ngadto sa kapulisan sa ilang mga kalihukan sa pagsugod sa tuig tigtungha.
Gitumbok ni Abellanosa sa iyang pagpasabot nga kini gikinahanglan aron mapatunhay ang kahapsay ug kalinaw sa mga kalihukan sa mga tunghaan pinaagi sa pagbantay sa kapulisan human sa pagpamusil sa usa ka tunghaan sa kaulohan, diin tulo ang nangamatay.
Unang nisupak og maayo mao ang mga tinun-an ug magtutudlo sa University of the Philippines (UP) Cebu kay alang kanila nagpig-ot kini sa kagawasan sa mga institusyon sa edukasyon.
Apan ang pangutana gyud unta, gikinahanglan ba ang mao nga ordinansa karong panahuna?
Di lang sa Pilipinas nahitabo ang pagpamusil sulod sa mga campus. Sa Estados Unidos mas daghan ang mga kaso sa pagpamatay o masaker gyud.
Apan kadaghanan sa mga kaso wa mahitabo atol sa kalihukan, naigo sila atol sa normal nga tingklase. Way bisan gamay nga warning.
Ang matag tunghaan nasayod na kon kanus-a gikinahanglan ang presensya sa kapulisan. Kana kon dunay kasamok atol sa klase o kon sa ilang huna-huna gikinahanglan ang presensya sa kapulisan atol sa dagkong mga kalihukan.
Makadeterminar usab sila kon gikinahanglan ba ang dugang mga security personnel base sa sitwasyon sa matag tunghaan, labina sa mga institusyong pampubliko.
Busa wa na kinahanglana ang ordinansa alang niini. Naghatag lang kini og dugang trabaho sa kapulisan nga mas gikinahanglan sa kadalanan alang sa police visibility nga mas importante aron kapugngan ang mga krimen.
Klaro kaayo nga kini nga ordinansahon, nga dako og posibilidad nga mapasar, mahimong tipik sa mga ordinansa nga wa mapatuman sa pagpanglabay sa katuigan.