UNDANG una ang kalipay sa disco human nga nagpagula og Executive Order No. 001 si Banaybanay Mayor Lemuel Ian Larcia sa Davao Oriental nga nagdeklara sa suspensiyon sa pagpahigayon niini sa tanang barangay activities sa lungsod.
Nagsumikad kining tanan human dunay duha ka mga lalaki ang gipangdunggab sa diskohan niadtong Biyernes, Enero 20, 2023, diin kritikal ug talandugon karon ang kahimtang sud sa balay tambalanan.
Unod sa EO No. 001, "Declaring Suspension of Disco in All Barangay's Activities" kon diin giingon nga usa sa katuyoan niini aron mamentinar ang kahapsay ug kalinaw sa barangay labi na sa kinatibuk-ang katawhan sa lungsod sa Banaybanay.
Una niini, daghan mga netizens ang nag-post sa ilang kapungot dihang human sa pipila ka mga disco sa mga barangay sa lungsod duna gayoy matigayon nga kasamok.
Ang kagubot naglangkob sa riot, sinumbagay, pinuspusay og mga gahi nga butang ingon man ang pagsangko sa dinunggabay. Tungod niini, gilayong gipagula ni Mayor Larcia ang EO No. 001 niadtong adlaw'ng Sabado, Enero 21.
Ang residente sa usa ka barangay sa Poblacion sa Banaybanay nga si Frederick (nagpatago sa bansagon), 24-anyos, nagbutyag sa iyang panglantaw sa maong EO.
"Maayo kaayo kay aron masumpo gyod ang mga dautang hitabo, pero okay ra man unta naay kalingawan kay ang tawo man gud gikan sa pandemic, gusto pud malingaw, kulang lang gyod ang security, unta ang municipal mayor's office mobutang sila og daghang security personnels ug dunay coordination sa PNP para mabutangan sab og mga pulis nga mobantay sa palibot," ingon ni Frederick nga nahinabi sa SuperBalita Davao Lunes pinaagi sa Facebook Messenger.
Naningkamot na sab ang awtoridad sa Banaybanay Municipal Police Station nga di na masubli ang maong hitabo labi na sa lain pang akibidad sa barangay.
Gipahan-ay na ang pagpasaka og kaso batok sa mga responsable sa pagpanunggab.