Barrita: 3 ka tuig nga fixed term sa mga opisyal sa AFP

Barrita: 3 ka tuig nga fixed term sa mga opisyal sa AFP

Gikataho nga dunay mga bagulbol sud sa Armed Forces of the Philippines (AFP) tungod niining tulo ka tuig nga fixed term sa mga dagkong opisyal sa AFP.

Subay kin sa Republic Act (RA) No. 11709 kansang tumong mao ang pagpadayon sa modernisasyon ug pagpalig-on sa professionalism sa AFP.

Tumong usab niini nga malikayan ang gitawag nga “revolving door accommodation promotion” kun pag-promote sa usa ka opisyal sa taas nga posisyon sa armadong kusog bisan kon sa pipila na lang ka buwan moretiro na siya sa katungdanan.

Ang RA 11709 gipirmahan ni kanhi Presidente Rodrigo Duterte niadtong Abril 13, 2022.

Ubos sa maong balaod, tulo ka tuig ang tour of duty sa Chief of Staff, Vice Chief of Staff, Deputy Chief of Staff, Commanding General sa Philippine Army ug Philippine Air Force, Flag Officer sa Philippine Navy, Commander sa Unified Command ug Inspector General.

Sanglit maghupot man sila sa maong mga posisyon sud sa tulo ka tuig, dunay mga opisyal sa militar nga moretiro na lang kay wa nay kahigayunan pa nga ma-promote sa maong mga posisyon.

Mao tingali kini ang hinungdan sa mga bagulbol sud sa AFP.

Nunot niini, si Defense Secretary Carlito Galvez Jr. namahayag nga girekomendar niya nga tangtangon ang tulo ka tuig nga fixed term sa maong mga opisyal sa armadong kusog.

Matud pa niya, gisuportahan sa Senado ang iyang rekomendasyon.

Si Senate President Juan Miguel Zubiri niingon nga ipasar sa Senado sa unang tulo ka buwan ning tuiga ang balaudnon nga mag-amendar sa RA 11709.

Samtang si Senador Jinggoy Estrada, chairman sa Senate national defense and security committee, namahayag nga ang pag-amendar sa maong balaod way kalambigitan sa gikatahong kisaw sa han-ay sa militar nunot sa pagluwat sa katungdanan ni interim Defense Secretary Jose Faustino Jr.

Matud ni Estrada nga siya ug si Zubiri ningpasaka og managlahing mga balaudnon sa pag-amendar sa maong balaod sa wa pa ang mga bagulbol sa mga sakop sa militar.

Si Presidente Ferdinand "Bongbong" Marcos Jr., matud niya, mi-certify usab nga urgent sa House Bill No. 6517 nga mag-usab sa maong balaod.

Sa miaging semana, si Faustino miangkon nga wa siyay kalibotan sa kausaban sa liderato sa AFP sa dihang gitudlo pagbalik sa pangulo si Gen. Andres Centino isip AFP chief, hinungdan sa pagbiya sa maong puwesto ni Lt. Gen. Bartolome Bacarro.

Matud ni Faustino niluwat siya sa katungdanan sa dihang nasayod siya sa mga balita ug sa social media nga nanumpa na sa katungdanan si Centino atubangan sa Presidente sa Malacañang.

Sa ato nang giingon, ang atong mga balaod wa ikulit sa bato busa mahimong amendahan ug usbon kon gikinahanglan.

(edbarrita@gmail.com)

Related Stories

No stories found.
SunStar Publishing Inc.
www.sunstar.com.ph