Pahibalo sa mobasa nga kining atong hisgotan tsismis lang ug way klaro kon tinuod ba o dili.
Lingawlingaw lang sa mobasa ang atong tuyo niini.
Adunay gipakatap karon nga tsismis bahin sa nahitabong raid diin pipila ka mga milyunes ang gikatahong nakuha sa mga raider isip ebidensiya sa salaod o krimen nga nahitabo.
Dali nga gideklarar ang mga milyunes pesos nga nasakmit apil sa mga ebidensiya nga nakuha batok sa mga gidudahang nakalapas sa balaod.
Kon imong paminawon, sama sa ordinaryo lang ang nahitabo ug dili angay pistahan sa estorya.
Gani, angay pasidunggan ang mga raider tungod sa laing kalampusan na sab sa kampanya batok sa krimen.
Pagmatuod lang kini nga walay gisanto ang mga raider, kon nakalapas ka, angay nga dakpon ka ug pasakaan sa tukmang sumbong.
* * *
Apan dunay twist o counter-plot.
Samtang adunay kantidad nga gideklarar nga maoy nasakmit, nga maoy kauban sa mga ebidensiya sa maong krimen, nigawas sa maong tsismis nga dili diay kini ang hustong kantidad kay duna pa diay daghan nga nasakmit apan wala iapil sa deklarasyon.
Giunsa man pagpasabot sa maong tsismis nga aduna pay dugang mga kantidad nga wala ideklarar?
Kay nakuhaan man og video, matod pa.
Giunsa man pagkuha sa video nga apil man ang video footage sa mga ebidensiya nga gisumiter sa mga raider?
Matud pa sa tsismis, adunay laing video footage nga wala makit-i sa mga raider nga maoy nag-record sa tanang nahitabo gawas sa lain pa nga video footage, nga maoy naka-record sa mga panghitabo human kuhaa ang una nga video footage.
Mogawas nga duna diay duha ka mga video footage sa maong lugar ug ang usa ra ka video footage ang nasakmit.
Ang ikaduhang video footage mao karon ang gipistahan sa mga marites kay daghan ang makita nga wala maapil sa unang video footage.
Tinuod ba kini o dili?
Tubag – sa gikaingon ko na, tsismis lang kini ug angay pa klarohon kon tinuod ba gyod o dili.
* * *
Adunay usa ka mayor nga last-termer na. Gusto unta niya nga ang iyang asawa ang mosunod sa iyang tunob sa pulitika pero hugot gyod ang pagbalibad sa asawa.
Napugos ang mayor paggamit sa iyang anak babaye.
Bisan manggiulawon ang iyang anak, gipugos na lang gyod sa mayor nga mosulod sa pulitika ang iyang anak.
Unsay iyang gihimo?
Gihimo una niya kini nga kagawad sa lungsod.
Sa nahimong kagawad na, kanunay niya kini dad-on sa tanan niyang mga lakaw, ipailaila sa katawhan ug pugson pagpatagad sa mga tawo.
Makita nga pinugos lang ang gihimo sa anak sanglit manggiulawon man kini apan wala mahutdi sa paglaom ang mayor nga maanad ra ang iyang anak.
Bisan magdula sa basketball ang mayor, kauban gyod ang anak pirmi kay ipailaila sa mga kauban.
Kon dunay bag-ong amigo labi na kon dako og ranggo, seguruon gyod sa mayor nga magpa-selfie ang iyang anak ug patuparon gyod sa paglingkod.
Tinud-anay gyod ang plano sa mayor nga ipuli ang iyang anak inig kahuman sa iyang termino.
Matud pa sa nakahibalo, pagkaluoya sa anak pero mas makaluluoy ang lungsod kon ingon ani na lang ang atong basehan sa pagpili sa usa ka mayor.