Bag-ong nakapiyansa sa iyang kaso sa paghupot og ilegal nga drugas ug armas nadakpan og balik sa gilusad nga buy-bust sa mga sakop sa Sawang Police Station sa Cebu City Police Office (CCPO) sa Lunes sa gabii, Enero 23, 2023.
Ang operasyon gipahigayon sa sityo Mahayahay II, Barangay Pasil, dakbayan sa Sugbo ubos sa pagdumala ni Police Major Francis Renz Talosig.
Ang suspek giila nga si Vincent Rodriguez, alyas JV, 21, E-bike driver, taga Belgium Street, Barangay Suba ning dakbayan.
Si Rodriguez nakuhaan og 10 ka bulto sa gituohang shabu nga motimbang og kapin sa usa ka kilo nga gibanabana nga mokantidad og P7,174,000.
Matud ni Police Lieutenant Colonel Conrado Manatad, deputy city director for administration sa CCPO, nga makabaligya ang suspek og duha ka kilo matag duha ka semana.
Ang ilegal nga drugas nga nakuha kang Rodriguez giingong gikan kang Teofilo Bacalso Rivera, alyas Filo, nga nabilanggo sa Cebu City Jail human nadakpan niadtong Nobiyembre 2022.
Giingong adunay tawo si Filo nga ginganlan og alyas Okong, apan nadakpan niadtong Septiyembre 2022, ug si Rodriguez maoy nihulip.
Tungod niini, giingong siya na ang kanunay tawgon ni Rivera kon adunay mga transaction.
Matud pa mo-dispose siya sa drugas ngadto sa Barangay Pasil ug mga silingang barangay.
Hugot nga gimonitor sa Sawang Police Station ang kalihukan ni Rodriguez human masayri nga nakapiyansa siya sa iyang mga kaso.
Nagpadayon pa ang ilang imbestigasyon sa suspek kon asa gikan ang supply sa ilegal nga drugas bisan nakuha na nila kon kinsa ang contact sa sulod sa city jail.