Usa ka kanhi binilanggo nga bag-o lang nakagawas sa Cebu City Jail Male Dormitory nipasangil nga adunay mga jail officer nga magpabayad og P50,000 ngadto sa P60,000 aron palutson ang mga cellular phone sa bilanggoan.
Ang kanhi binilanggo nga si alyas Berto, kinsa bag-o lang nakagawas sa City Jail, nadakpan sa Simultaneous Anti-Criminality and Law Enforcement Operation (SACLEO) sa miaging semana.
Matud ni Berto nga ang pagpasulod sa mga kontrabando, apil na ang cellular phones, hugot nga gidili sa pasilidad sa Bureau of Jail Management and Penology (BJMP).
Ordinaryo lang nga mga cell phone ang ilang ipalusot nga daling matago sama sa brand nga Vivo ug Oppo.
“Tag P50 mil to P60 mil, kanang mga ordinary nga cell phone lang, mga class A lang nga cell phone ba... mga BJMP ra man magpalusot ana,” butyag ni Berto.
NAKAHIBAWO
Iyang gidugang nga kon mag greyhound operation ang mga sakop sa BJMP uban sa Philippine Drug Enforcement Agency 7 ug kapulisan, mahibawo na sila daan ug pasidan-an sila nga taguon ang ilang cellular phones.
Ang ilang buhaton kuhaon sa usa ka inmate ang ilang mga cell phone ug itago sa atop o bisan asa na lang isuksok nga dili makita sa mga pulis ug PDEA personnel.
Apan kadtong mga big time nga inmate nga dunay dagkong mga kaso sa ilegal nga drugas makig-alayon sa mga BJMP personnel aron sila na ang motago sa telepono sa binilanggo.
“Ako big timer ko. Moingon ra ko nga, Sir, hiposa sa na, Sir, ako lang bahala. Moana nga, sige ako lang hipos ani. Daghan, mga karaan nga mga BJMP pila na ka tuig nga nagserbisyo diha, mga karaan kusog magpasud og ingon ana,” dugang ni Berto.
Lakip sa gipalusot ang mga sigarilyo nga ibaligya sa sulod og mahal na ang presyo.
Wala hinuon siya mohatag sa mga ngalan kinsa ang maong mga personnel nga nalambigit.
BUKAS SA IMBESTIGASYON
Si Jail Officer 3 Blanche Bation, spokesperson sa Cebu City Jail Male Dormitory, nibutyag nga si Jail Superintendent Gregorio Acacio, warden, abli sa pakig-alayon ug kooperasyon sa posibling ilusad nga imbestigasyon.
“As per talk namo ni Warden, very open siya nga mo coordinate and mo cooperate sa atoang PNP at the same time sa PDEA if and when necessary. Related ni sa kadtong allegation sa nadakpan nga aduna mi personnel diri sa Cebu City Jail nga involved sa pagpasulod sa mga cellular phones,” matud ni Bation.
Kon mogawas sa imbestigasyon nga tinuod ang pasangil sa kanhi binilanggo nga dunay BJMP personnel nga nalambigit, ila kining ikiha.
Lakip sa ilang subayon ang pasangil nga naa sa sulod ang contact sa mga durugista nga madakpan sa kapulisan sa anti-illegal drug operations.
Gipasalig sa BJMP nga bisan unsa ka gamay nga impormasyon gikan sa mga drug personality, ila kining hatagan sa pagtagad aron masumpo ang pagkatap sa ilegal nga drugas nga ang mga naa sa sulod sa bilanggoan nagpadayon gihapon sa ilang ilegal nga negusyo.