CARLO MOLDES

Greenhills, San Fernando, Cebu


(’Child abuse’ refers to the maltreatment, whether habitual or not, of the child which includes (2) any act by deeds or words which debases, degrades or demeans the intrinsic worth and dignity of a child as a human being.-- RA 7610.)

Sulod sa merkado nagdali-dali og areglar sa mga tinda ang batan-ong dalagita nga sinuhulan para mobantay sa tindahan sa mga duwaan ug uban pang gamit sa balay. Sa laing bahin sa lungsod, sa karsada paingon sa merkado, nagpakusog og padagan ang usa ka drayber sa ‘chappy’ nga motoriklo, daw dunay giapas nga maabtan.

Naigking si Princess, 16 anyos, dihang nadungog niya ang silbato sa motorsiklo. Natagak ang hanger sa mga kalo nga iya untang ibitay sa atubangang bahin sa tindahan. Iyang gisusi kinsa ang nibusina. Di diay mao ang iyang gipaabot. Niagi sa iyang atubangan ang iro nga gibusinahan, dayon ang motorsiklo. Mibalik siyag pang-displey aron makalingkod na siya sa suok sa tindahan inig-abot adtong lalakiha.

Sa laing bahin nagmaneho si Roger sa iyang motorsiklong ‘chappy’. Tulo na ka tawo ang nipara niya nga iyang gisayluan. Kursonada siyang nilahos sa parkingan sa mga ‘chappy’ atbang sa naglinya nga mga tindahan sa mga duwaan. Gahaguros siyang nisumpay sa linya, dayong kanaog sa motorsiklo ug milantaw sa tindahan sa iyang amiga nga dalagita. Milabang siya.

“Hi, my Princess,” ni Roger nga mi-posing sa ganghaan sa tindahan.

“Uy, kuya Roger!” Mihangad si Princess gikan nga nag-teks sa iyang selpon. “Sayo lagi ka karon?” “As always!” mikatawa si Roger nga nag-ininglis pa.

“Aw, unsa man imo, Ya?” mibarog si Princess ug mitutok kang Roger.

“Ikaw.” Mingisi si Roger dayon mikatawa.

“Di man ko baligya, Ya,” hilaw nga mikatawa si Princess.

“Aw, di man tika paliton, uya_bon man tika.”

“Di ko anang uyab-uyab, Ya, uy! Bata pa ko. Unsa may imo, Ya? Shades?.”

“Naa na koy shades, chicks na sad ako.” Gikawat pagkupot ni Roger ang kamot sa dalagita. Gibawi ni Princess ang iyang kamot. “Wa man mi chicks diri, Ya!”

“Kini lang ako,”ni Roger dayong kab-ot sa ‘pendant’ sa kuwentas ni Princess sa dughan niini. Wa kalihok ang dalagita sa kahadlok, bisan pa man nga nagsaghid-saghid ang mga tudlo sa drayber sa iyang dughan ibabaw sa iyang tutoy. Mingisi ang lalaki nga nagtutok kang Princess.

“Gwapaha gyud nimo, uy!” Gihikap sa drayber ang aping sa dalagita ug gisunod ang liog niini. “Ari sa ko, my Princess.” Mitalikod si Roger ug gipasok iyang kamot sud sa iyang karsones, daw aduna siyay gipahimutang sa sud. Dayon nigawas sa tindahan.

Nagkurog nga milingkod si Princess. Mitingog iyang selpon. Adunay ni-teks. Mitubag siya, “Okey na. Salamat.” Paghuman niyag ‘send’ sa iyang ‘reply’ mitindog siya ug milantaw sa parkingan sa mga ‘chappy’. Didto si Roger nagbarog ug naglantaw kaniya nga nagngisi samtang naminaw sa tabi-tabi sa tapok sa mga drayber.

UNYA may nangabot nga mga pulis. Miduol ang usa kang Roger. Gikuptan iyang abaga samtang dunay gisulti. Misiga ang mga mata ni Roger nga milantaw sa dalagita. Nahibulong. Nahadlok. Gikuptan sa pulis ang iyang tangkugo ug gipikpik ang iyang aping. Milugnot siya. Wa hinuon siya pusasi pero gikuptan sa mga pulis ang iyang mga bukton ug giguroy siya paingon sa ‘police patrol car.’ Migawas si Princess sa tindahan aron moapil sa tapok. Puwerteng sabaa. “Ngano to?” “Child abuse kuno.” “Kinsay nagpadakop ato?” “Natawgan na ninyo ang iyang asawa?” “Oo, padung na kuno sa police station, hapiton pa daw niya ilang mga anak sa eskuylahan.” (KATAPUSAN)