Tingali ang uban ninyo nakahinumdom pa nilang 1974 Miss Universe Amparo Muñoz ug 1994 Miss Universe Sushmita Sen? Mao ning mga tuiga dihang gipahigayon ang Miss Universe pageant sa Pilipinas. Tan-awa kon asa na sila karon ug ang uban nilang kaubanang titleholders.

AMPARO MUÑOZ | 1974 Miss Universe

Si Amparo Muñoz ang labing una ug nag-inusarang Spanish titleholder sa Miss Universe nga gikoronahan sa Manila. Apan si Muñoz nakontrobersiyal dihang gibuhian niya ang iyang titulo unom ka buwan human sa iyang kadaugan. Katulo siya nakasal apan puros buwag. Naputos sa eskandalo ang iyang kinabuhi ug nasakit sa depression, acute pancreatitis ug brain tumor. Si Muñoz namatay sa edad nga 56 niadtong Pebrero 2011 tungod sa aneurysm.

SUSHMITA SEN | 1994 Miss Universe

Si Sushmita Sen ang labing unang Indian nga nidaug sa Miss Universe sa edad nga 18. Apan sa edad nga 47 ang beauty queen-turned-Bollywood actress nagpabiling single. Niadtong 2000 duna siyay gisagup nga batang babaye ug laing batang babaye niadtong 2010. Si Sushmita na-diagnosed og Addison’s disease niadtong 2014 nga nagkinahanglan og lifelong steroid drugs.

HILLEVI ROMBIN | 1955 Miss Universe

Si Hillevi Rombin ang unang Swedish beauty queen nga nidaug sa Miss Universe. Nag-artista siyag kadiyot sa Hollywood ug gikasal sa business magnate nga si G David Schine. Apan niadtong 1996, siya ug ang iyang bana ug usa sa ilang mga anak ang lakip sa namatay sa plane crash. Si Rombin ang unang Miss Universe nga nitaliwan sa edad nga 62.

ARMI KUUSELA | 1952 Miss Universe

Si Armi Kuusela sa Finland ang pinakabatang Miss Universe sa edad nga 17 ug labing unang Miss Universe winner niadtong Hunyo 1952. Apan gibuhian niya ang iyang titulo aron magpakasal sa hotelier nga si Virgilio Hilario nga iyang nahimamat pila ka buwan gikan sa iyang kadaugan. Apan pag-1975 namatay sa heart attack ang iyang bana. Si Kuusela subling nagpakasal pag-1978. Sa edad nga 88 si Kuusela aktibo gihapon sa charity works.

CHELSI SMITH | 1995 Miss Universe

Si Chelsi Smith ang unang babaye sa Texas ug ikaunom sa USA nga nakoronahan sa Miss Universe. Ang iyang kaminyuon sa fitness coach nga si Kelly Blair nilanat lang og kapin sa upat katuig. Niadtong 2017 si Chelsi na-diagnosed og liver cancer. Namatay ni pagkasunod tuig sa edad nga 45.

DAYANARA TORRES | 1993 Miss Universe

Nakaila pa tingali mo sa Puerta Rican beauty queen nga nag-artista sab niadto sa Manila ug ex-girlfriend ni Aga Muhlach? Si Dayanara Torres single gihapon human sila nag-divorced sa singer nga si Marc Anthony niadtong 2004. Pag-2019 nagbuwag usab sila sa iyang fiancé nga si Marvel Studios co-president Louis D’ Esposito human siya na-diagnosed og skin cancer.

AMELIA VEGA | 2003 Miss Universe

Si Amelia Vega ang unang pambato sa Dominican Republic nga nidaug sa Miss Universe sa edad nga 18. Siya usab ang tallest winner (6’2”) sa kasaysayan sa maong pageant. Niadtong 2011 nakasal siya sa NBA player nga si Al Horford ug mabdos karon sa ikalima nilang liwat.