Suwayan pagposte sa Meralco Bolts ang ikaduha nilang sagunsong kadaugan sama sa gidaghanong mga duwa sa ilang pagpakigbatok sa NorthPort Batang Pier sa main game karong alas 6:45 sa gabii sa Philippine Basketball Association (PBA) Governor’s Cup sa Philsports Arena sa Pasig City.
Sa premiro nilang tahas, taas nga boltahe sa opensa ang gigamit sa Bolts aron pakuryentihan ang Rain or Shine Elasto Painters, 105-87, niadtong Enero 22, 2023 atol sa pagsugod sa season-ending conference.
Tataw nga kining maong dakong kadaugan nakahatag og dugang kadasig sa Bolts aron makabawi sa dili maayo nilang kampanya sa niaging Comissioner’s Cup diin igo lang silang nahiluna sa ika-10 nga puwesto.
“Even though we didn’t finish the way we wanted to last time, we have a chance to restart, come back with the right frame of mind this conference,” matud ni Meralco balik-import KJ McDaniels nga napatik sa www.pba.ph.
Nakahatag sab og dugang kadasig sa Bolts ang pagbalik sa usa sa ilang mga sinaligan nga si Chris Newsome, kinsa sulod sab sa upat ka mga buwan nga wala nakaduwa tungod sa calf injury.
“He’s our most productive player scoring, assisting and rebounding in his position,” batbat ni Meralco coach Norman Black kabahin kang Newsome.
Sa ilang bahin, ang Batang Pier mosuway pagbangon human sila nasubhan og dakong kapildihan batok sa Converge FiberXers, 122-99.
Ang Batang Pier padayong mokombati nga wala ang duha sa ilang mga sinaligan nga sila si Robert Bolick ug Arwind Santos.
Sa laing bahin, ang FiberXers mosuway sab pagposte og 2-0 nga rekord sa ilang pagpakigsangka sa Terrafirma Dyip sa premirong duwa sugod karong alas 4:30 sa hapon. / ESL