Human sa sibuyas bombay, misaka na sab ang presyo sa itlog sa Metro Manila. Gikan sa P6.90 niadtong Disyembre, naa na karon ang medium nga kadak-on sa itlog sa P9 ang matag usa.

Bisan si Presidente Ferdinand Marcos naalarma na busa iyang gimandoan ang Dept. of Agriculture nga susihon kon unsay nahitabo kay kon nisaka man ang presyo sa matag itlog gikan sa mga egg farm, gamay ra kaayo ni.

Ang nabantayan mao ang grabeng pagpaburot sa mga negusyante sa presyo sa ilang pagpamaligya sa merkado. Matag itlog, gipatungan og labing minus P2 matag usa.

Ang presyo, labing mahal sa mao nga gidak-on sa itlog, naa lang unta sa P7.50, matud sa usa ka opisyal sa Department of Agriculture. Wa sab maghinit ang supply. Human sa asukar ngadto sa sibuyas bombay, karon naa na sab ang itlog.

Kining tulo pulos nag-unang mga panginahanglan sa mga Pinoy bisan tuod kon mahimo rang magluto nga way sagol nga sibuyas bombay.

Ning tulo ka klarong pagpahimulos sa mga negusyante sa ilang pagpresyo sa nag-unang mga palaliton, wa pay nabuhat ang kagamhanan pinaagi sa pagbutang og higpit nga price ceiling aron di makapatuyang sa pagpatung ang mapahimuslanong mga negusyante.

Silutan kadtong magpahimulos, sama niadtong gipanggukod sa Dept. of Trade and Industry (DTI) nga mga negusyante nga nagpatuyang sa pagpahimus sa presyo sa face mask niadtong sayong bahin sa pandemic.

Sukad sa asukar ug karon misunod na sab ang presyo sa itlog, ang DA wa gihapoy gibuhat sa pagpasaka og kaso sa mga negusyante nga mapahimudsanon. Kon dunay ikiha ang DA ug tinud-on sa pagtaral sa hukmanan, mag-amping na ang ubang mga negusyante.

Naa may balaud nga magamit nga hinagiban sa kagamhanan sa pagbadlong o pagsanta sa mga negusyante nga magpatuyang sa pagpaburot sa bulsa sa way paghuna-huna nga magping-it sa kalisod ang katawhan.