Nikabat sa 20 ka mga balay ang naugdaw ug lima ang nakan-ayo sa kayo sa sunog nga niigo sa Sityo Callejon, Barangay Labangon, Siyudad sa Sugbo, alas 11:43 sa buntag sa Miyerkules, Enero 25, 2023.

Matud ni FO1 Pedie Canillas sa Cebu City Fire Office (CCFO), sagad sa mga balay ginama sa light materials ug ang kinatibuk-ang danyos mokabat og P3.3 milyunes.

Dugang ni Canillas, ang sunog nagsugod sa balay nga ginama sa kahoy sa pamilyang Alonzo apan giabangan sa usa ka Shaira Mae Villeno.

Ang sunog gisaka sa unang alarma sa alas 11:44 sa buntag ug alas 12:13 sa udto, gideklarar sa mga bombero nga nakontrolar ang kayo ug paglabay sa pipila ka minuto, hingpit kining napalong.

Pasiunang nasayran ni Canillas nga ang balay diin nagsugod ang kayo walay kuryente hinungdan nga ilang palawman ang pakisusi.

Si Labangon Barangay Captain Victor Buendia nga daling niduaw sa lugar niingon nga kanunay na maigo sa sunog ang dapit ug ang ulahing sunog maoy iyang giisip nga labing dako.

Dugang niya nga ang mga nasunogan temporaryo una nilang gipahiluna sa gym sa barangay. (BBT)