Ang pamilya sa angkas sa motorsiklo nga namatay human nalatayan sa usa ka prime mover truck sa Barangay San Roque, Dakbayan sa Talisay sa Sabado, Enero 21, 2023, hingpit nang nipasaka og kaso batok sa drayber.
Kasong reckless imprudence resulting to homicide and physical injury ang gipasaka nga kaso batok sa maong drayber sa prime mover.
Mao kini ang gibutyag ni Jonathan Tumulak, pangulo sa City of Talisay-Traffic Operations and Development Authority (CT-TODA), bahin sa ikaduhang disgrasya sa kadalanan sa 2023 sa dakbayan.
Ang managhigugmaay nga sila si Marilou Hermosa, 24, taga Lower Sampaguita, E. S. Fortuna, Dakbayan sa Mandaue ug Roy Aribias, 27, taga Campo 8, Dakbayan sa Toledo nasabdan sa trak.
Si Hermosa nalatayan sa trak human matumba ang motorsiklo samtang si Aribias naangol.
Matud ni Tumulak, ang drayber sa prime mover nga si Michael Brobo, 45, taga Barangay Pitogo, Lungsod sa Consolacion ug ang motorsiklo nga gimaneho ni Aribias parehong nagsubay sa Cebu South Coastal Road (CCSR) dihang nahitabo ang aksidente.
Dugang niya nga ang matag habig nga nalambigit sa disgrasya managlahi usab ang bersiyon sa hitabo.