Nakatala og 2,334 ka mga aksidente sa kadalanan sa 2022 sa dakbayan sa Talisay ang City of Talisay-Traffic Operations and Development Authority (CT-TODA).

Ang hepe sa CT-TODA, Jonathan Tumulak, nibutyag nga sa 2,334 ka mga bangga nga ilang narespondehan, 1,626 niini ang nagpabiling ubos sa imbestigasyon.

Sa 1,626 nga under investigation, walo niini ang dunay nakalas nga kinabuhi.

Gibutyag ni Tumulak nga naglambigit niini ang mga dump truck, tanker, motorsiklo ug ubang pribado nga mga sakyanan.

“Yes, regarding pud sa kining atong gitawag nga responded unya mga alarma, mas daghan og nadawat namo nga alarma ang nag involved og motorcycles,” pahibalo ni Tumulak.

Sa natala sa CT-TODA nga naglambigit sa disgrasya sa motor sa Cebu South Coastal Road sa 2022, niabot kini og 500 ka buok.

Samtang sa dalan N. Bacalso nga naglambigit sa motorsiklo, nitala ang CT-TODA og 627 samtang sa private four-wheeled vehicle moabot sa 726 ka disgrasya.

Ang CT-TODA karong tuiga mohimo og mga plano aron makunhoran ang gidaghanon sa mga disgrasya hinungdan nga si Tumulak nipatawag og panagtigom sa iyang traffic enforcers sa milabay nga semana.

“Like for example katong akong gi-mention kaganiha reckless, kusog magpadagan human mokalit lang og gawas sa iyang linya unya bisan na og about to stop, mo beat sa atong traffic light imbes nga mohunong, mo beat. Lain pas usa sa mga hinungdan, like for example, sa mga trak nga adto moagi sa agianan sa mga motor unya mag ekis-ekis nga mga motor,” pagpasabot ni Tumulak.