Gilusad sa Kagamhanan sa dakbayan sa Danao ang project Sidlak o Singgit sa Danawanong Luwas ug Abag Kontra-droga aron masumpo ang pagkatap sa ilegal nga drugas sa dakbayan. Lakip sa programa ang paghatag og ganti sa mga lugar nga drug-free na.

Sa Martes, Enero 24, 2023, gipasidunggan ang siyam ka mga barangay nga gawasnon na sa drugas nga mao ang Binaliw, Ibo, Malapoc, Manlayag, Mantija, Pili, Sandayong Norte, Sandayong Sur ug Togonon.

Gawas sa maong programa, lakip sa gilusad ang programa nga Bida (Buhay Ingatan, Droga’y Ayawan) sa Danao City.

Ang Bida program gipangulohan sa Department of the Interior and Local Government (DILG).

Sa maong adlaw, nilagda usab og manifesto ang kagamhanan pinangulohan ni Mayor Mix Durano kauban ang nagkadaiyang mga ahensya sa pakigbatok sa ilegal nga drugas sa siyudad.