Duha ka most wanted persons tungod sa kasong lugos sa Lalawigan sa Sugbo nasikop sa Martes, Enero 24, 2023.

Unang napusasan si Jay Niño Bacon, 18, alyas Botchok, ulitawo, drayber, taga dalan Camomot, Barangay Poblacion 1, dakbayan sa Carcar.

Si Police Lt. Col. Ardioleto Cabagnot, hepe sa Carcar City Police Station, nagkanayon nga si Bacon ilang nadakpan alas 5:00 sa hapon sa Martes, Enero 24, 2023, sa Sitio Cogon, Poblacion.

Matud ni Cabagnot nga si Bacon nag-atubang og duha ka counts sa kasong pagpanglugos ug walay piyansa nga gitugot ang korte. Si Bacon naa sa no. 5 most wanted person sa probinsya sa Sugbo.

Apan ang suspek hugot nga nihimakak sa mga pasangil batok kaniya. Gipadayag niya nga wala siya makaila sa biktima.

Samtang, ikaduhang most wanted person sa Negros Occidental nasikop alas 5:00 sa hapon sa Marte sa Barangay South Poblacion, dakbayan sa Naga.

Si Reymar Quiapo Ababa, 29, dunay kapuyo, construction worker, taga San Benito, Calatrava, Negros Occidental, nasikop.

Si Lt. Col. Junnel Caadlawon, hepe sa Naga City Police Station, nagkanayon nga ang suspek hugot nga nihimakak sa pasangil batok kaniya.

Matud pa, human napasakaan og kaso sa Negros Occidental, nilarga siya dinhi sa Sugbo.