Gihandom sa Police Regional Office (PRO) 7 ang kabayanihon sa 44 ka Special Action Force (SAF) commando nga nakalas atol sa misyon sa Barangay Tukanalipao, lungsod sa Mamasapano, lalawigan sa Maguindanao walo na ka tuig na ang nakalabay.

Ang pangulo sa PRO-7, Police Brigadier General Jerry Bearis, nangulo sa wreath laying ceremony sa Miyerkules sa buntag, Enero 25, 2023, sa parade grounds sa Camp Sergio Osmeña, Sr. uban ni Police Major General Arthur Cabalona, deputy commander sa Area Police Command Visayas.

Ang paghandom karong tuiga dunay tema nga “Legacy of Heroes: Inspiration of Future Generations”.

Kahinumdoman nga ang maong mission nga gitawag nga Oplan Exodus nahimong malampuson kay napatay ang ilang target nga usa ka gikatahapang international terrorist. Uban sa operation ang tulo ka mga Sugboanon nga silang PO3 Junrel Kibete, PO2 Romeo Cempron ug PO1 Windel Candano.

Gawas niini, giila usab sa PRO-7 ang sakripisyo nga gihatag sa laing mga sakop nga nakalas samtang naghimo sa trabaho nga silang Police Master Sgt. Michael Candido Alde, Police Staff Sgt. Careby Clyde Valle Alinsug, Police Staff Sgt. Jade Carabuena ug Police Cpl. Rey Agustilo Ambo.

Sa mensahe ni PNP Chief Police General Rodolfo Azurin Jr. nga gipasupot niini pinaagi ni Cabalona, ang makapasubo nga kamatayon sa SAF 44 makapahinumdon sa selflessness ug debosyon sa trabaho sa kapulisan.