Ang Land Transportation Office ( LTO-7) nipahibawo nga wala nay transaksyon sa LTO Mandaue sa J Center Mall nga gilangkuban sa ilang district office ug licensing center sugod sa Enero 23, 2023.

Ang gustong mo-transact mahimo silang moadto sa dakbayan sa Lapu-Lapu (Island Mall Licensing Center ug Lapu-Lapu District Office), Cebu City District Office sa Robinsons Galleria (alang sa registration), SM City Cebu, SM Seaside ug Robinsons Fuente LTO Licensing Center.

“The public is hereby informed that Mandaue City District Office and Mandaue City Licensing Center located at JCenter Mall, AS Fortuna, Bry. Bakilid, Mandaue City, Cebu will be closed indefinitely from January 23, 2023 (Monday) and until further notice,” pahibalo sa post sa LTO-7.

Ang JCenter Mall kasamtangang gisirado gumikan sa pag-ilis sa management.

Si Regional Director Victor Caindec nagkanayon nga ila unyang ipahibawo ang bag-ong lokasyon sa higayon nga manawat na usab sila og transaksyon aron usab dili makahigayon ang mga fixer.

“We will be announcing soon the new location of LTO Mandaue, both the district office and licensing center. Di sa nako ipahibalo asa kay kani mga fixer mura ni og hulmigas dali kaayo makasimhot,” matud sa post ni Caindec sa social media.

Ang labing taas nga opisyal sa LTO-7 nagkanayon sa pagkakaron padayon pa sila nga nakigsabotsabot ug nangita og lugar nga pabor sa katawhan.

Gipadayag ni Caindec nga dako og posibilidad nga ila gihapong sundon ang public private partnership sama sa ilang gibuhat sa Cebu City, Lapu-Lapu City ug Talisay City.