Usa ka 21 anyos nga babaye gidakop sa mga sakop City Mobile Force Company human masakpi nga misul-ob sa uniporme sa pulis samtang nisuroy sa JY, Barangay Lahug, dakbayan sa Sugbo alas 8 sa Miyerkules sa buntag, Enero 25, 2023.

Ang maong babaye giila nga si Lyza Dagpin, lumad nga taga Dapitan City, Zamboanga del Norte.

Atol nga nag roving ang mga pulis sa dapit, ilang nabantayan nga dunay babaye nga nagbarog sulod sa park sa JY Rotunda nga naka uniporme og pulis.

Usa sa mga pulis nakamay-ong nga ang maong uniporme gipanag-iya sa iyang classmate nga tungod niini gipangutana siya nganong siya ang nagsul-ob.

Daling gihubo ni Dagpin ang uniporme apan sa dihang gisuwayan na siyag gunit sa mga pulis, nilugnot siya ug nipasangil nga siya mabdos.

Si Police Lieutenant Colonel Gerard Ace Pelare, spokesperson ni Police Brigadier General Jerry Bearis, pangulo sa Police Regional Office 7, nibutyag nga mahimong makiha ang maong babaye.

Kalapasan kini sa Article 179 sa Revised Penal Code kun ilegal nga paggamit sa uniporme ug insignia.

Gawas niini, mamahimo sad siya nga ikiha og pagpangawat sanglit duna may nanag-iya sa uniporme nga iyang gisul-ob ug kon mamatud-an nga nagpaka aron-ingnon siya nga pulis, laing kaso ang atubangon niini nga mao ang usurpation of authority nga naa usab sa balaod.

“Mao na ang mga kaso nga iyang posibling gi commit. Investigation is now ongoing. I would like to inform the public that there is a specific law prohibiting any civilian to wear uniform ug insignias of the PNP as well as to usurp the duties of the police officer,” matud ni Pelare.

Nipasabot si Pelare nga daghan ang wala makahibawo nga dunay balaod nga nagdili sa mga sibilyan sa pagsul-ob sa uniporme sa mga tinugyanan sa balaod.

Sa pangutana kon ang maong babaye dunay gihambin nga problema sa pangisip, mamahimo gihapon siya nga dakpon ug didto na sa korte ipamatuod pinaagi sa finding sa doktor nga mohiling kaniya.