PRO 7 andam mosuporta sa imbestigasyon sa BJMP

File photo
File photo

Andam mohimo og imbestigasyon ang Police Regional Office (PRO) 7 labot sa pasangil sa kanhi bilanggo sa Cebu City Jail (CCJ) nga nalambigit ang personnel o jail officers sa Bureau of Jail Management and Penology (BJMP) sa pasilidad sa pagpalusot og kontrabando.

Si Police Lieutenant Colonel Gerard Ace Pelare, tigpamaba ni Police Brigadier General Jerry Bearis, hepe sa PRO-7, nagkanayon nga internal matter sa BJMP ang maong kaso nga angay sila maoy mangunay sa pakisusi.

Apan iyang giklaro nga magpaabot lang sila sa BJMP nga moduol kanila aron motabang sa paghimo og imbestigasyon kinsa kining BJMP personnel nga gilambigit sa ilegal nga kalihukan.

“This involves BJMP personnel allegedly so ang among buhaton ani, we will conduct investigation upon request from BJMP. Of course, we will be willing to investigate especially if we can co-relate it contrabands nga mao sad ang among gipangita sa PNP,” matud ni Pelare.

Gipasalig sa PRO-7, matud ni Pelare, nga ang PNP andam nga motabang sa BJMP pagsulbad sa maong problema kon gikinahanglan ang ilang tabang.

Apan kon tugotan ang PNP nga molusad og imbestigasyon, mahimong mosusi sila sa kasong kriminal nga nalapas sa maong mga BJMP personnel nga gilambigit.

Kon dunay impormasyon nga ang cellular phones gigamit sa illegal drug transaction nga maoy pagduda, ang kapulisan makatabang sa BJMP.

Gikonsiderar hinuon sa PRO-7 nga usa ka seryuso ang aligasyon sa kanhi binilanggo sa CCJ nga angay nga sutaon sanglit mamahimo kini nga makasamot sa problema sa supply sa ilegal nga drugas sa Central Visayas.

Wala pa hinuon masayod si Pelare kon asa karon nakakustodiya ang kanhi bilanggo nga nipasangil sa personnel sa bilanggoan sa dakbayan sa Sugbo, apan iyang gipasalig nga ila kining hatagan sa seguridad ilabi na nga nadakpan na usab kini og balik sa kaso sa ilegal nga drugas.

Mamahimong mangita sila og pamaagi nga dili lang una ma commit sa BJMP ang maong kanhi binilanggo samtang nagpadayon pa ang imbestigasyon.

Una nang nibutyag si alyas Berto nga naghitak ang cellular phone sa sulod sa CCJ tungod sa pagtugot sa mga BJMP personnel nga maka sulod bugti sa bayad nga P50,000 ngadto sa P60,000 ang matag usa.

Kasagaran sa mga nalambigit sa ilegal nga kalihukan ang karaan na nga mga personnel.

“Tag 50 to 60 mil, kanang mga ordinary nga cellphone lang, mga class A lang nga cellphone ba... mga BJMP raman magpalusot ana,” matud ni Berto.

Kon dunay plano sa greyhound operation, pahibaw-on sila sa personnel nga ipatago ang ilang cellular phones aron di masakpan sa mga sakop sa Philippine Drug Enforcement Agency (PDEA) 7 ug kapulisan.

Kadtong mga bigtime nga drug player giingong ang mga BJMP personnel ang mangunay sa pagtago ani.

Nipasalig ang BJMP labi na ang kadagkoan sa CCJ nga mohimo sila og imbestigasyon sa pasangil sanglit giila nila kini nga seryuso nga alegasyon.

Sa miaging tuig, ang BJMP uban sa PDEA 7 ug kapulisan nilusad sa kinalit nga greyhound operation sa pipila ka jail facilities sa Central Visayas, usa ani ang CCJ ug bisan usa ka kontrabando walay nasakmit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph