Usa ka concerned citizen nga si Jonel Sacedo, dunay screen name nga ‘Josa Chiongbian Osmeña’, nipasaka og kasong nepotismo batok kang Cebu City Mayor Michael Rama sa Office of the Ombudsman sa Martes, Enero 24, 2023.

Sa pakighinabi sa SunStar Cebu sa telepono, si Sacedo niingon nga iyang gipasaka ang kaso batok kang Rama human niya mahibaw-i nga duha sa mga bayaw ni Rama nga sila si Elmer ug Gomer Gimenez-Mandanat, gitudlo nga mga kaswal nga empleyado sa City Hall.

Sila si Elmer ug Gomer igsuon ni Malou Rama, ikaduhang asawa sa mayor.

Si Gomer gitudlo nga Administrative Aide III niadtong Hulyo 1, 2022, samtang si Elmer gitudlo nga process server sa samang adlaw.

Gipasiugda ni Sacedo nga gitudlo sa mayor ang mga igsuon sa iyang asawa samtang “dili makatarunganon” ang pagtangtang sa labing minos 800 ka mga empleyado sa City Hall sa pagsugod sa bag-ong termino sa mayor sa Hulyo 2022.

Gihimakak sa reklamante nga dunay koneksyon sa pulitikanhong kaatbang ni Rama nga si kanhi mayor Tomas Osmeña, matud niya, gigamit lang niya ang screen name aron pagtago sa pagkatawo.

Si Atty. Colin Rosell, secretary ni Mayor Rama, nitug-an sa SunStar Cebu nga base sa talaan sa City Hall, “Nag-work sila, gitudlo na sila sa kanhi mayor. Ug unya gitudlo sila nga mga coterminous nga posisyon ubos ni Mayor Rama.”

Matud ni Rosell nga walay merito ang kaso.

Nagduda ang abogado nga “malice” ang gipasaka nga kaso sanglit niadtong 2021 lang naminyo si Rama sa iyang ikaduhang asawa.

“Dili lang ni pulitika. Malisya kini, ” ingon niya.

Si Mayor Rama niingon nga iyang tubagon ang mga pasangil sa tukmang forum.

“Tubagon lang. Sige lang, tubagon na nato. Mabalaka ra tag naa tay gibuhat, wala man. When it comes to appointment, ato sang tan-awon ang pleading kay dili ta kadiretsog tubag kon walay pleading,” matud sa mayor. (JKV, DCD)