Mayor sa lungsod sa Alcoy nga nag-ehersisyo sakay sa iyang mountain bike nabanggaan sa usa ka awto mga alas 5:48 sa Miyerkules sa buntag, Enero 25, sa national highway sa Brgy. Poblacion, lungsod sa Dalaguete.
Si Mayor Michael Sestoso, 56, gikataho nga nalabay ug nawad-an og panimuot sa kakusog sa impact.
Ang drayber sa Nissan Almera, color gray, giilang si Ricardo Capudoy, 43, taga Maribago, Lapu-Lapu City.
Si Sestoso nag-inusarang nagbiseklita dihang nahitabo ang aksidente.
Gidali siya pagdala sa tambalanan sa lungsod sa Dalaguete ug gibalhin sa laing tambalanan sa lungsod sa Argao.
Gikan sa Argao gibalhin siya sa usa ka pribadong ospital sa dakbayan sa Sugbo ug gikataho nga luwas na ang kahimtang, apan padayong giobserbahan sa mga doktor.
Matud ni Police Major Gilfred Baroman, hepe sa Dalaguete Police station nga nahinabi sa Superbalita Cebu, nga ngitngit pa ang palibot atol sa hitabo.
Ang sakyanan gimaneho ni Capudoy, kinsa padung usab sa lungsod sa Oslob kay giingong dunay kuhaon nga mga turista.
Asoy ni Capudoy kanila ni Baroman nga tulo ka mga sakyanan ang iyang gisundan nga padung usab sa south samtang si Sestoso padung na usab mopauli sa Alcoy subay sa samang dalan.
Apan ang iyang gisundan nga sakyanan kalit lang niliko sa wala hinungdan nga nilihay siya padung sa tuo nga didto si Sestoso.
“Pareha ni sila travelling in the same direction. Accordingly ang giingon sa driver naa na’y tulo pa ka sakyanan nga gisundan before pa ni Mayor. Pag-abot sa intersection, ni execute og right turn ba o left turn mao to. Wa niya makita si Mayor nga nag bike, nadumbolan niya maong napasok ang bike sa ilawom sa awto unya si Mayor nalagpot. Naligidligid si Mayor,” matud ni Baroman.
Ang kagamhanan sa Alcoy niluwat og pamahayag alang sa pag-ampo sa paspas nga recovery ni Mayor Sestoso.
Sa kasamtangan, gi-detain na si Capudoy sa police station sa Dalaguete.
“Sa part sa driver, ni-manifest man sila nga mo shoulder sila sa medical expenses ni Mayor,” matud ni Baroman sa Enero 25, 2023.
Sa uwahing pahibawo sa lungsod, conscious na ang mayor ug stable ang kondisyon niini.
Si Sestoso nakaangkon og mga samad sa iyang likod ug bitiis.
“He is now conscious and in a stable condition with minor wounds in his back and thigh. X-ray results showed no sign of fractures,” asoy sa LGU Alcoy.
Dunay pay mga laboratory examination nga ipahigayon alang sa mayor.
“Join us as we pray for the speedy recovery of Mayor Michael,” dugang niini.
Subay niini, nanawagan usab ang kapulisan sa mga biker ug riders sa lugar nga magsul-ob gyud og reflectorized vest ug mabutang og blinkers aron dali kining makit-an ug kalikayan ang disgrasya.