GIDEMOLIS ang mga puwesto sa Mini Park Vendors Association (MPVA) duol sa Southern Philippines Medical Center (SPMC) Miyerkules, Enero 25, 2023.
Mga 60 ka puwesto subay sa JP Laurel Avenue duol sa SPMC gidemolis aron nga gamiton ang maong lugar sa renobasyon sa ospital, pangulohan sa Davao City Engineer’s Office (CEO-Davao) Demolition team.
Apan pipila sa mga manindahay nagboluntaryo nang nanghipos sa ilang mga tinda ug nagguba sa ilang mga tindahan una pa ang gilusad nga demolisyon.
Gikanayon ni Engineer's Office Demolition Team Lead Dante Porcadilla nga mga manindahay gihatagan og notisya sayo pa niadtong Enero 5 karong tuiga.
Giklaro sab niini nga nahibawo na ang mga manindahay nga ang ilang mga business permits di na ma-renew karong tuiga tungod sa gitakdang demolisyon.
"January 5 pa lang gitagaan na sila'g notice diri, niagi pa ni sila'g dialogue, pero last notice na to siya," pagklaro ni Porcadilla.
“[Nakigsabot mi sa mga vendors] last Friday, [mihangyo sila na] extend sila'g June [30, 2023], wala na [nadayon] kay gamiton mang SPMC, gamiton mang atubangan," dugang pa ni Porcadilla.
Samtang gisulti ni MPVA president Benedic Casi nga nadismaya siya sa desisyon sa Konseho sa siyudad ug ni Davao City Mayor Sebastian "Baste" Duterte bahin sa "kalit" nga demolisyon.
Gikanayon niini nga ang asosasyon o mga manindahay wala makalapas og bisan unsang artikulo sa ordinansa sa siyudad.
"Sa tanan nga nagpirma sa ordinance na ipa-demolish mi, iampo na lang tamo sa inyong gibuhat sa amoa, nawad-an mi'g katungod [na manginabuhi]," matud ni Casi sa paghinabi pinaagi sa Bombo Radyo Davao.
Si Lenlen Acosta, usa ka sari-sari store ug printing services vendor sulod na sa 15 ka tuig, nanawagan sa mga opisyal sa CEO ug sa lokal nga panggamhanan nga hatagan sila og relokasyon ug uban pang importanteng serbisyo nga makatabang kanila nga makasugod sa ilang panginabuhian pag-usab.
"Unta matagaan lang mi'g relocation ba, kay lisod kaayo walay panginabuhian, wala mi mabalhinan," sumala niya. (ICE)