NAPULO ka gialegar nga mga suspek nga gilambigit sa pagpatay sa negusyante nga si Yvonne Chua Plaza, sumala sa Special Investigation Task Group Plaza (SITG). Ang motibo sa pagpatay giingong "crime of passion".

"Based on our witness, the victim already has sensitive information against General Durante and she uses it to blackmail him," matud ni Regional Director Police Brigadier General Benjamin Silo Jr. sa Police Regional Office (PRO)-Davao Region atol sa press conference sa SITG Plaza sa Bagani Hall sa PRO-Davao Miyerkules, Enero 25, 2023.

Gikompirma sa mga miyembro sa SITG nga sa 10 ka suspek nga gipresentar, pito niini mga sundalo ubos sa 1001st Brigade, usa ka sibilyan ug ang laing duha kinsa wala pa maila kung sibilyan ba o personahe sa brigade.

Niadtong Disyembre 28, 2022, gipatay si Plaza gawas sa iyang balay sa duha ka mga mamumuno.

Bisan tuod kon si Brigadier General Jesus Durante III, Brigade Commander sa 1001st Brigade, ubos sa 10th Infantry Division (10ID) una nang mihimakak sa akusasyon nga gialegar nga mipatay sa biktima, tungod matud niya nga si Plaza iyang "higala", apan ang SITG team nagsulti nga ang utok sa pagpatay nagtumbok kaniya.

"The Macbook recovered from the victim's house containing contacts, intimate photos, and email messages directed to General Durante," sumala ni SITG.

Sumala sa SITG, si Durante mihatag og mando "to liquidate the victim" ngadto kang Deputy Brigade Commander Michael Licyayo sa lima pa ka laing suspek ubos sa iyang kamandoan, nga gipanganlan nga sila si SSg Gilbert Plaza kinsa naila isip team leader, CPL Adrian Cachero ang drayber sa motorsiklo, SGT Delfin Sialsa, ang mamumuno, CPL Romar Longakit, ug CPL Rolly Cabal kinsa maoy gitahasan sa "casing surveillance".

Laing suspek nga gipanganlan og Noel Hapitan giila isip "striker" sa "murder case".

Giingon usab nga nadugtong sab nila ngadto sa "jealousy" isip usa sa mga hinungdan nganong gipatay si Plaza, apan di nila masuta kung mabdos siya kay ang otopsiay sa lawas niini wala gitutok sa pag-ila niini.

Samtang gipasaka sa SITG ang kasong murder, obstruction of justice o Presidential Decree (PD) 1829 ug theft ngadto sa gialegar nga mga suspek o Revised Penal Code (RPC) Article 308.

Sa managlahi nga paghinabi uban sa SunStar Davao pinaagi sa mensahe, Enero 25, si PRO Davao spokesperson Police Major Eudisan Gultiano nagsulti nga tungod kay wala pa ang warrant of arrest, di pa nila makostudiya ang mga suspek, hinuon, matud niya nga ang ubang mga suspek gikustodiya na sa 10ID nga ubos sa ilang organisasyon.

Gikompirma sab ni 10th ID spokesperson Capt. Mark Anthony Tito sa lahi nga paghinabi sa SunStar Davao pinaagi sa mensahe nga si Plaza, Cachero ug Sialsa naa sa ilang kustodiya, samtang si Longakit ug Cabal wala pa igkita.

Gitin-aw ni Bgen Allan Hambala, Asst. Division Commander sa 10ID nga ang kalambigitan sa ilang personahe sa pagpatay walay kalabutan sa serbisyo sa organisasyon.

"Rest assured your army will fully cooperate in the conduct of the investigation," pasalig ni Hambala.