Way eskwelahan dinhi sa ato nga nagtutok pagtudlo natong mga ginikanan sa mga insaktong pamaagi sa pagpadako ug pagdisiplina sa mga anak aron matunhay ug matul-id ang dalan nga padulngan ug mapalayo sa diskaril.
Kon naa man gali, segurado ko nga magpunsisok tang tanan og pa-enroll aron magiyahan ta og insakto unya mamahimong mga responsibling miyembro sa katilingban ang atong mga anak inig ka dako.
Ang akong lindog karon mahitungod sa mga “Social Skills” para sa mga bata.
Sa akong kaugalingong kasinatian, mas maayo nga sugdan ang pagmatuto sa bata sa sayong pangidaron. Diay akong personal nga kasinatiang ipaambit labi na sa mga bag-ong ginikanan:
Sa gamay pa ang mga bata, sugdan na ang pagtudlo sa paglitok sa pulong nga ‘salamat o palihog’ hangtod nga maanad. Apil niini ang paghuwat sa turno, pagtabang sa uban, pagpahuwam o pag-uli sa hinuwaman, pagpangayo og tabang, pagkamaluluy-on ug pagkamanggihatagon.
Sa di pa sila motungha sa pormal nga edukasyon, kitang mga ginikanan maoy pirmirong mga magtutudlo sa atong mga anak. Pasabot, kita maoy ilang modelo sa pang-adlaw adlaw nga tulumanon ug gimbuhaton.
Matod pa bitaw sa propaganda kaniadto, ‘Sa mata ng bata ang ginagawa ng matanda ay tama’. Kon unsa ilang nakita dihang nagdako sila, mao sab ni ilang sundon ug mahimong sumbanan kon mahamtong na.
Maayo sab nga tudloan ang mga bata pagdayeg sa uban, pagdawat sa kapildihan o kapakyasan kay di man sa tanang panahon kita magmadaugon o malampuson kon sa English pa ‘being a good sport and a good loser’ way initay ug way dumtanay.
Nindot sab pasabton ang mga bata nga dili sa tanang panahon matuman ilang gusto o silay magbuot kay mao ni makapa-spoil hinuon nila.
Dalaygon sab ang pagtudlo sa mga bata sa insaktong pagtahod ug pagrespito sa mga maguwang o nag-una sa duyan.
Mas maayo sab imatuto sa sayop nga pangidaron ang pagkamaluluy-on, matinahuron, masinabtanon, manggihatagon ug labaw sa tanan pagpuyo sa Kristuhanong kinabuhi nga mahadlukon sa Dios.