Ang Province of Cebu ug Old Philippine Railway Residents Association (Oprra) Inc. adunay pending nga kaso sa Regional Trial Court (RTC) Branch 8 sa Cebu City, Enero 26, 2023.
Niadtong buwan sa Abril, 2021, ang Oprra Inc., pinaagi sa ilang abogado, niduso og manifestation ug motion sa RTC Branch 8 nga nag-ampo nga ang korte momando sa Province of Cebu, kinsa maoy defendant, nga makig-estorya sa plaintiff nga mao ang Oprra Inc. pagtahod sa nahiuna nilang desisyon niadtong Disyembre 15, 1997.
“The PROVINCE agrees to the resumption of the signing of the individual Deeds of Conditional Sale in accordance with Master Sales Agreement after the approval of this Agreement, which shall cover all members of OPRRA of good standing as determined by OPRRA,” tipik sa paragraph 2 sa page 2 sa Decision sa Branch 8.
Niadtong Hunyo 24, 2021, ang Province of Cebu nitubag didto sa Branch 8 may labot sa manifestation ug motion sa Oprra Inc. nga gusto nilang ipa-deny ang pag-ampo sa plaintiff sanglit lugi ang Probinsya sa presyo nga gilatid sa compromise agreement nga giaprobahan sa korte niadtong 1997 diin ang amahan ni Garcia nga si anhing gobernador Pablo Garcia, ang pangulo sa lalawigan niadtong higayona.
“Based on a recent appraisal, the value of these lots are already at P11,000.00 per square meters, to force the Province of Cebu to sell said lots at a price of P10.00 per square meters today is GROSSLY UNCONSCIONABLE and DISADVANTAGEOUS to the interest of the Province of Cebu, to borrow the words of the Sangguniang Panlalawigan’s Committee on Provincial and Municipal Properties Committee Report 02-2012,” tipik sa tubag sa Province of Cebu pagpa-deny sa motion sa Oprra Inc.
Ang Branch 8 niadtong June 15, 1993 niisyu sa iyang desisyon ug gisundan kini sa Writ of Execution (WE) niadtong Septiyember 17 sa samang tuig nga nimando sa paghatag og kopya sa WE ngadto sa buhatan sa gobernador ug sa provincial treasurer ug sa registry of deeds sa Cebu City.
Gimando niini ang “the resumption of the signing of the individual deeds of conditional sale in accordance with the Master Sales Agreement which by reference forms part of the judgment”
Gumikan niini, niabot na ngadto sa 214 ka mga miyembro sa Oprra Inc. ang adunay deeds of sale uban sa Province of Cebu nga defendant nga giaprobahan niadtong 2016 ug 2019 ug adunay laing 45 ka sakop sa Oprra Inc. ang naghuwat pa sa execution sa deed of sales gikan sa Province of Cebu.
Ang Supreme Court of the Philippines Second Division niadtong October 8, 1998, niingon nga final and executory na ang desisyon sa RTC Branch 8 human gi-dismissed ang petition for review on certiorari sanglit gi-file kini niadtong Abril 24, 1998, apan ang deadline niadto pang February 27, 1998.
Si ElRoy Pintor, presidente sa Oprra Inc., nagkanayon nga huwaton lang una nila ang mamahimong desisyon sa korte sa dili pa sila mohimo og sunod nga lakang kabahin sa pagpursige sa Province of Cebu pagbaligya sa lote balor og P11,000 matag metro kwadrado sanglit iyang gihulagway nga wala pa sila sukad mapatawag para sugdan paghusay ang kaso.
Sa miaging semana, gipahibawo sa Kapitolyo pinaagi sa taho sa Sugbo News, ang opisyal nga news platform sa Probinsya, nga adunay 156 ka mga homeowners sa Oprra Inc ang mahimong maka-apply para sila makapanag-iya sa luna sa Barangay Kalunasan nga nagkantidad og P11,000 matag metro kwadrado pinaagi sa Pag-Ibig Fund nga nigawas niadtong Enero 13.
Si Garcia nagkanayon nga ang P11,000 mao ang appraisal sa yuta niadtong tuig 2019 ug ang iyang gipadayag nga nisaka na usab ang appraisal niini apan wala na nila gi-update.
Ang gobernador nakigtagbo sa 156 ka mga homeowners niadtong Huwebes nga gitambungan usab sa mga opisyal sa National Housing Authority ug Pag-Ibig Fund diin si Garcia nagkanayon nga ang tanyag para ra sa mga nitambong.
Ang Oppra Inc. adunay 543 ka mga available subdivided lots diin 214 niini natitulohan nga gipuy-an karon sa ilang mga miyembro. (PAC)