Gisuspenso og 90 ka adlaw sa Land Transportation Office-7 (LTO 7) nga way suweldong madawat ang acting chief sa LTO Camotes Island Extension Office gumikan sa “dishonesty, falsification of document ug kapakyas wala pagsulod sa trabaho panahon sa office hours.”
Si LTO 7 Director Victor Caindec nipahamtang sa maong silot ngadto kang Editha Y. Soco kinsa dul-an na sa 30 ka tuig nga nagserbisyo sa LTO Central Visayas, nagsugod og serbisyo sa iyang suspensyon niadtong Lunes, Enero 23, 2023.
Ang labing taas nga opisyal sa LTO 7 nipadala og komunikasyon ngadto kang LTO Chief Atty. Jose Arturo Tugade, assistant secretary sa Department of Transportation (DOTr) aron pahibaw-on sa gihimong aksyon sa regional office.
“In the best interest of the service and as a result of the personnel audit conducted by the management, the Acting Chief of Camotes Island Extension Office, Ms. Editha Y. Soco is presently on Preventive Suspension per attached Office Order for ninety (90) days upon receipt of the Formal Charge for Loafing from Duty during Regular Office Hours,” tipik sa suwat ni Caindec.
Gitugyan na sa regional director ngadto sa Assistant Secretary ang kapalaran ni Soco base sa mga ebedinsya nga ilang nadiskobrehan batok sa kanhi acting chief sa LTO Camotes.
Nasayran base sa gihimong random audit nga gihimo sa LTO 7 ug nasuta nga absent si Soco didto sa iyang buhatan base sa pamahayag sa iyang staff.
Apan si Soco giingong nakapakita og boat ticket nga siya nisakay gikan sa mainland Cebu, diin siya nagpuyo, paingon sa Camotes apil na ang security logbook.
Apan dihang gi-validate sa LTO 7 sa Philippine Coast Guard ang photocopies sa dokumento sa iyang pagsakay subay sa manifesto, wala ang iyang pangalan, kansang ebedinsya gihulagway ni Caindec nga paigo na para siya tangtangon sa serbisyo.
Si Soco niasumir isip acting chief sa LTO-Camotes sa ikaduhang higayon niadtong Oktubre 18, 2021 ug ang una niadtong Hulyo 2019. (PAC)