HUSTISYA ang singgit karon sa pamilya ug kabanay sa barangay kapitan nga gipusil patay sa wala mailhing mga mamumuno 4:20 sa hapon, Huwebes, Enero 26, 2023, sa Lebak, probinsiya sa Sultan Kudarat.
Giila ang biktima nga si Rogelio "Tentoy" Talagtag Jr., 53, minyo ug kapitan sa Barangay Basak sa Lebak sa maong probinsiya.
Matud ni Lebak Chief of Police Lieutenant Colonel Julius Malcontanto, nagbarog atubangan sa iyang tindahan ang kapitan sa Purok Beverly Hills, Barangay Basak dihang giduol sa wa mailhing suspek ug gipusil gamit ang kalibre .45 nga pistola.
Daling misibat ang mamumuno sakay sa motorsiklo nga gimaneho sa iyang kauban human mahimo ang tuyo.
Si Talagtag nakabsan dayon sa kinabuhi human nakaangkon og samad pinusilan sa ulo ug sa nagkadaiyang parte sa lawas.
Matud sa pamilya nga buotan ang biktima ug walay atraso sa ilang dapit busa wa nila damha nga patyon siya.
Hinuon kapulisan sa Lebak Municipal Police Station duna nay persons of interest nga posibleng nalambigit sa maong pagpatay sa kapitan.