GISUGDAN na sa safety and security cluster sa Davao City, pangulohan sa Davao City Police Office (DCPO), ang paglusad og pagpakig-alayon isip preparasyon alang sa Araw ng Davao, Ironman 70.3, ug Micecon 202 -- tanan gitakdang mahitabo sa Marso.
Ang Micecon karong tuiga mahitabo sa Marso 1 hangtud 3, samtang ang selebrasyon sa Araw ng Davao gitakda sa Marso 1 hangtud 16, sundan sa Ironman 70.3 triathlon race sa Marso 26.
"Actually, ongoing na ang atoang mga series of conferences with the safety and security cluster for the Araw ng Davao," tug-an ni DCPO spokesperson Police Major Catherine Dela Rey atol sa AFP-PNP media forum sa The Royal Mandaya Hotel niadtong Miyerkules, Enero 25.
"Plus, within that week pud ang atoang Ironman so busy ang whole safety and security cluster sa dakbayan sa Davao, especially ang Davao City Police Office kay gina-aim nato na zero incident gihapon ang Araw ng Davao ug sa Ironman," puno pa niya.
Ang pagpangandam sa seguridad nagkinahanglan og dugang konsiderasyon kay ang public health protocols ug mga restriksiyon sa lihok gipanglibkas na. Hinuon, tungod kay ang maon mga kalihukan nahimo na ug nagmalampuson sa milabay'ng panahon, sundon na lang ang gilatag nga seguridad niadtong mga panahona.
Pananglitan ang half-marathon 21-kilometer segment sa triathlon race mosunod sa samang rota gikan sa Victoria Plaza hangtud sa Azuela Cove ug balik, gilauman nga mga dalan nga sirad-an mao gihapon, matud ni Dela Rey. Mga pahimangno sa publiko ang ipagawas una mahitabo ang mga dagkong kalihokan aron nga masayran sa katawhan.
Langkuban ang seguridad alang ning maong mga petsa sa "maximum deployment" sa kapulisan.
Dugang ayuda gikan sa kasundalohan ihatag sab sa Police Regional Office.
Dugang ni Dela Rey nga ang security cluster sa siyudad naghiusa aron nga maseguro ang "zero-incident" nga mga taho atol sa maong mga kalihukan. (Uban sa taho sa CIO)