GIPAILAWOM sa seminar sa Women and Children's Protection Desk (WCPD) sa San Pedro Police Station ang mga ginikanan sa pito ka mga menor de edad nga na-rescue sa kapulisan sa Mobile Patrol Group sa Davao City Police Office (DCPO) human kini gipangdala sa San Pedro police Biyernes sa buntag, Enero 27, 2023.
Kini human nga nanawag og pulis ang security guard sa dapit samtang ang nasampit nga pito ka mga batan-on naa sa sulod sa usa ka nasirado na nga chinese restaurant sa F. Torres Street, Davao City.
Gilayong miabot ang Mobile Patrol Group diin ang duha moaksiyon pa og dagan apan nagunitan sa mirespondeng mga pulis samtang ang lima naa sa sulod padayong nanguha og mga electrical wires.
Dihang nahibal-an na sa lima nga naa na sa mobile patrol ang duha nila ka kauban, misakay na lang sab sila human sila na-korner.
Giingon nga dugay nang nanirado ang maong restawran apan naa pa gihapon kini mga gamit sa sulod.
Ang nasampit nga mga batan-on pulos nagpuyo sa Barangay 76-A, Bucana ning siyudad sa Davao.
Pag-abot sa mga nahisgutan sa Women and Children's Protection Desk (WCPD) sa San Pedro PNP, daling nangabot ang mga ginikanan sa maong mga menor de edad.
Gipailawom sa seminar ang mga ginikanan sa pito sa nadangatan sa ilang mga anak.
Pahimangno sa kapulisan, atimanon ang mga anak, labi na ang mga menor de edad gumikan kini maoy usa pa ka dakong responsable sa mga ginikanan aron dili kahimo og dautan diha sa katilingban.