Sukad nga gitugotan na sa gobiyerno ang mga kalihukan sa sports, ang Sugbo morag gibaha sa mga liga sa basketball.
Bisan gani ang atong college teams, gawas lang sa University of San Jose-Recoletos (USJ-R) Jaguars, wa mag-usik og panahon ug aktibong misalmot sa nagkalainlaing tournament human matapos sa miaging buwan ang Cesafi competition.
Kini aron paghatag og igong exposures sa ilang players ug ingon man pagmintinar sa ilang physical condition.
Pananglitan, sa bag-o lang natapos nga Chooks-to-Go Sinulog Cup sa Cebu Coliseum, tulo ka mga regular collegiate team sa Cesafi ang misalmot ug nakigkombati sa laing upat usab ka commercial teams sulod sa usa ka semanang panagtigi.
Kini mao ang University of Cebu (UC) Webmasters, University of Southern Philippines Foundation (USPF) Panthers, University of San Carlos (USC) Warriors ug ang Benedict College nga giingon magpasakop sa maong asosasyon sa umaabot nga season.
Sa nagpadayon nga inter-collegiate sa lungsod sa Dalaguete, nangapil usab ang Cesafi defending champion University of the Visayas (UV) Green Lancers, Cebu Institute of Technology-University (CIT-U) Wildcats, USPF Panthers, UC Webmasters ug ang Southwestern University (SWU) Cobras.
Daghan pang kalungsoran ang naghan-ay karon aron makapahigayon og liga dili lang sa collegiate teams kon dili lakip na usab ang sa mga local commercial level.
Usa sa mga gikahinaman karon nga giatngan sa kadaghanan mao kining gilaraw nga liga sa lungsod sa Moalboal- ang Mayor Titing Cabaron Fiesta Cup.
Ato lang unya hisgutan ang mga detalye ani puhon kon mahapsay na ang tanan nga mga preparasyon.
Ang dakbayan sa Toledo gidungog nga mopahigayon usab og tournament sa local commercial teams.
Laing liga mao ang Northball 25-under nga salmotan sa mga team gikan sa nagkalainlaing lungsod sa Sugbo.
Gisugdan na sab paghikay ang preparasyon alang sa Pilipinas Super League 21 ug 18 under category Visayas leg nga giingong moabli sa bulan sa Marso.
Unya sa 1st District sa Probinsiya sa Sugbo, nagpadayon na sab ang Gullas Cup 21-under.
Liga diri, liga didto. Wa nay nagkontrolar.
Dili kaha mao na ning panahon nga kinahanglan hiusahon ang basketball leaders sa atong probinsiya aron mao nay mohapsay ug malikayan ang conflict sa mga tournament sa kalungsoran, ilabi na sa scheduling.
Hinaot nga mahatagan kinig pagtagad sa Kapitolyo kay ako nagtuo nga silay adunay igong gahum ug kapasidad nga makabuhat sa ingon.