Ang pagbiseklita maanindot, apan giubanan sab ni og kakuyaw. Kon ikaw ang makadasmag, o ikaw ang madasmagan, alkanse ka pulos. Apan as much as possible, likayan ang mga aksidente.
Kon naa ka sa karsada sa gabii, mas maayong kompleto ka sa suga aron ka makita. Ayaw sab pagsul-ob og itom nga senina.
Busa, ayaw pagsikad sa gabii kon wa kay blinkers nga gitaud sa imong bike.
Labing minus duha ka buok ang imong itaud ug mas maayong duna kay labing minus usa ka blinker sa imong helmet.
Di kini solusyon aron hingpit kang makalikay sa aksidente sa kadalanan kay duna baya say mga drayber nga mapasagaron, reckless ba nga kon makapadagan og sakyanan, sama ra nga sila ray naa sa karsada.
Kon imong huna-hunaon, labina kon branded ang blinkers nga imong paliton, medyo mahal. Apan way kwarta nga makatumbas sa imong kinabuhi, labina kon ikaw ang breadwinner.
Mag-unsa na lang ang imong pamilya kon mawala ka?
USO UNTA
Niadtong nagsige mi og night ride sa dihang aktibo pa ang Cebu Folding Bike Society, nakatabang to sa awareness sa publiko sa kaimportante sa blinker sa pagsikad magabii.
Tinuod nagsuroysuroy mi sa kadalanan but among napakita ang kamahinungdanon sa blinker. No blinker, no ride mi. No helmet, no ride. Ing ana mi ka estrikto basta kaluwasan na sa rider ang hisgutan.
Niadtong panahuna, grabe kataas ang demand sa blinker sa mga bike shop. Bisan gud sa mga department store, naa nay daghang mga baligya nga unta wa man kini unta mauso.
Apan naguol ko kay sa mga nagbiseklita karong panahuna, labina sa gabii, wa na may blinker. Bisan gani nang mga delivery sa Food Panda, duna koy mga nakit-an nga way bisan usa ka blinker nga giinstalar.
Kon di mataud sa box, mahimo kaayo nga anha kini sa helmet ibutang. Kon duha mas maayo kay mas taas ang visibility.
Hinaut pa nga ang Food Panda mohangyo o mo-require mismo sa ilang riders sa pagbutang og suga sa ilang mga biseklita aron sila mas luwas sa karsada panahon sa gabii.
DI MATAG-AN
Moabot ang disgrasya nga di mo lang damhon. Si Alcoy Mayor Michael Angelo Sestoso nadasmagan sa usa ka awto samtang siya nagsikad gikan sa Dalaguete padulong pauli sa iyang lungsod sa Alcoy.
Nalagpot ang mayor tungod sa impact samtang ang mga yantas sa iyang biseklita nangalingkong kay naguroy sa awto. Kaluoy sa Ginoo, di life threatening ang nahitabo kaniya.
Hayan ang iyang helmet nakapanalipod sa iyang ulo gikan sa mas grabe nga angol.