Malaumon si Moalboal Mayor Inocentes “Titing” Cabaron nga mosaka pa ang gidaghanon sa mga turista sa lungsod sa Moalboal subay sa padayong suporta nga nadawat niini gikan sa kagamhanan sa probinsya sa Sugbo ug sa Department of Tourism (DOT).
Subay sa asoy sa Moalboal Information Office, moabot sa 355,445 ang natala nila nga tourist arrivals sa 2022.
Moabot sa 264,528 niini ang day users o kadtong mga turista ug bisita nga moduaw sa adlawan nga ni-avail sa nagkadaiyang water activities sama sa island-hopping, sardine run ug turtle watching.
Samtang, natala usab niini ang moabot sa 90,917 ka mga turista nga nipundo og usa ka gabii sa lugar.
Gihulagway ni Cabaron nga nakita ang pagsaka sa datos sukad sa pagtugot ni Cebu Governor Gwendolyn Garcia sa pagsulod sa mga turista sa probinsya sa 2022.
“Ang pagsaka sa turista katong 2022, resulta ni sa pag-order ni Gov. nga i-ease down, or walaon na ang mga restrictions nga gipahamtang panahon sa Covid. Mao na ang mga turista, labi na ang foreign, nalipay kaayo ani kay wala na kaayo hassle, unya ang mga tourist destination nalipay usab kay moresulta man ni sa increased income kay nagkadaghan man ato turista. Mao pasalamat mig dako kang Gov. Gwen,” matud ni Cabaron pinaagi sa Moalboal local government unit (LGU).
Hinuon, nakita usab niini ang pag-ubos og 10 porsyento sa tourist arrivals sa Agusto atol sa pagsugod na usab sa klase.
Bisan pa niini, gipahibawo sa lungsod nga ni-steady ang pagdagsa sa mga turista sa uwahing lima ka buwan sa naasoyng tuig diin nakab-ot niini ang labing taas niadtong Disyembre nga moabot sa 10, 929 ka mga turista taliwa sa pagkanselar sa kagamhanan sa pipila ka water activities gumikan sa di maayong kahimtang sa panahon.
Malaumon hinuon si Cabaron nga mosaka pa ang tourist arrivals sa 2023 subay sa mas relaxed na nga lagda sa kagamhanan.
“Last year man gani nagsaka, how much [more] this year 2023, labi na ang atong Secretary of Tourism naghingusog gyud maayo nga ang tourism sa Pilipinas, dili lang sa Cebu...,” matud sa mayor pinaagi sa Moalboal LGU.