Giawhag sa mga sakop sa Parish Youth Coordinating Council (PYCC) sa San Juan de Sahagun Parish sa dakbayan sa Toledo ang publiko sa pag-apil sa tinuig nga kapistahan sa pagpasidungog ni Sr. Sto. Niño ug ang pagpahigayon sa Sinulog sa Toledo karong adlawa, Enero 29, 2023.
Sa Sabado, Enero 28, 2023, sugdan ang gihimo ang seaborne procession duol sa Toledo City Port sa alas 4:00 sa kaadlawon.
Usa ka landing craft tank, ang ASC Ashley sa Asian Shipping Corporation pinaagi ni Toledo City Councilor Ricardo ‘Kuya Nick’ Pepito maoy gisakyan sa imahen ni Sr. Sto. Niño uban sa imahen ni Birhen Maria sa kadagatan sa Tañon Strait.
Sumala sa pamahayag sa PYCC, ang seaborne procession “usa ka reenactment sa pag-abot sa barko ni Ferdinand Magellan sa kabaybayonan sa Sugbo atol sa 16th Century nga nagdala sa imahen sa Balaang Bata nga si Hesus - ang Sto. Niño de Cebu ug sinugdanan sa Kristiyanismo sa Pilipinas.
Alas 5:30 sa hapon sa samang adlaw, gipahigayon ang misa sa Vesperas o evening prayer sa simbahan sa parokya ni St. John of Sahagun ug nisunod ang solemne nga foot procession sa alas 6:00 sa gabii sa samang adaw.
Karong adlawa, Enero 29, 2023, ang parokya mopahigayon sa ilang tinuig nga Sinulog sa Toledo sa parish grounds.
Mokabat sa 75 ka contingents ang gipaabot nga mosalmot.
Ang piyesta sa ilang patron nga si St. John of Sahagun sa Hunyo 12 matag tuig.
Kahinumdoman, ang contingent sa Toledo sa Sinulog sa Carmen niadtong Enero 22, 2023 nanghakot sa major awards. (PR / RRM)