Mokabat sa 1,600 ka mga bag-ong rehistradong nurse ang ningsalmot sa mass oathtaking ceremony niadtong Sabado, Enero 28, sa IEC Convention Center (IC3) sa Barangay Mabolo, dakbayan sa Sugbo.
Ang face-to-face oathtaking sa mga bag-ong nurse gihimo sa Professional Regional Commission (PRC) uban ang Board of Nursing, Philippine Nurses Association (PNA) – Cebu Chapter Inc. ug Association of Deans of Philippine Colleges of Nursing Inc.
Samtang, grupo sa nurses nga nakabase sa Sugbo nidayeg sa lakang sa usa ka Sugbuanong kongresista nga i-legalize ang pagpasaka sa suweldo sa nurses nga nagtrabaho sa pribadong tambalanan ngadto sa P35,000 matag buwan.
Si Nurse Jacob Erm Jericho Dolino, public relations officer sa PNA - Cebu Chapter niingon sa SunStar Cebu niadtong Biyernes, Enero 27, nga kon mapasar na ang balaudnon, mas makaayo kini sa mga nurse.
Dugang niya nga ang mga nurse sa pribadong tambalanan angayan nga usbawan ang sweldo.
Ang House Bill 4609 o naila nga Magna Carta of Private Health Workers, nga gisang-at ni Cebu City South District Representative Edu Rama sa 19th Congress, nagtinguha sa usbaw sa suweldo ug paghatag sa gikinahanglang benepisyo sa pribadong healthcare workers.
Ang suweldo sa private hospital nurses sa Sugbo mo-average og P16K - P20K, itandi sa salary grade sa mga nurse sa pampublikong tambalanan nga P32K - P33K. (EHP)