Usa ka opisyal sa Artsidyosesis sa Sugbo nipaklaro nga ang ‘Sugbuswak’ nga plano di tuyo nga mabahin ang 500 ka tuig na nga artsidyosesis, kon dili, ang pagpanganak pa og duha ka diyosesis.
Si Monsignor Joseph Tan, tigpamaba sa Archdiocese of Cebu, niingon sa SunStar Cebu sa Biyernes, Enero 27, 2023, nga ang nag-unang katuyoan sa maong lakang mao ang mas maayong serbisyo ug pagdumala sa simbahan ngadto sa mga parokyano niini.
Matud ni Tan, anaa pa sila sa proseso sa pagpili sa mga ngalan nga itudlo alang sa preparatory committee niini, diin tun-an ang gikinahanglang proseso sa pagmugna sa duha ka bag-ong diyosesis, lakip na ang pag-apud-apod sa mga pari ug pagdumala sa kahinguhaan, ug uban pa.
Siya niingon nga ang mga komite mahuman sulod sa usa o duha ka bulan.
“Naay mga preparatory committee kay murag maghimo og tulo ka local churches, ug daghan technical requirements para ana, so ang committees itudlo para tun-an unsaon pagbuhat (Sugbuswak),” matud ni Tan.
Dugang ni Tan nga si Cebu Archbishop Jose Palma maoy mangunay sa finalization sa komitiba uban sa board of consultors sa Archdiocese.
Iyang gisubli nga ang Sugbuswak magkinahanglan og taas nga proseso una pa kini masugdan.
Bisan gikonsiderar nga usa ka eklesiastikanhong lalawigan, ang Artsidiyosesis sa Sugbo walay suffragan dioceses o diyosesis nga kini adunay direktang hurisdiksyon.
Matud niya, isip Arsobispo sa Sugbo, dili siya makadumala sa mga kalihokan sa iyang panon tungod sa gilay-on sa mga parokya sa amihanan ug habagatan sa Sugbo ug gusto niya nga mapaduol ang kaparian ug mga layko nga nagpuyo ning mga dapita. (HIC)