Usa ka 14 anyos ug hamtong nga lalaki gidakop sa alegasyon nga ninglugos sa 13 anyos nga babaye human nasakpan sa kabanay sa dalagita.
Nahitabo kini sa usa ka barangay sa lungsod sa San Fernando, lalawigan sa Sugbo, alas 9:50 sa gabii sa Biyernes, Enero 27, 2023.
Ang nasikop mao sila si Mateo (dili tinuod pangalan), 14, kinsa nangangkong uyab sa biktima nga nagpuyo sa nahisgutang lugar.
Lakip sa naposasan mao si Juan ‘Janjan’ Salud Entero, 27, ulitawo, mekaniko, ug taga Sitio Luna, Barangay Magsico, lungsod sa San Fernando.
Samtang, ang 13 anyos nga babaye mao si “Juliana” (dili tinuod pangalan), tinun-an sa Grade 6 ug nagpuyo sa samang dapit sa menor nga suspek.
Si Police Major Peter Naboye Jr, hepe sa San Fernando Police Station, nisaysay sa Superbalita Cebu, nangayog abag ang kabanay sa biktima hinungdan nga nasikop ang duha.
Positibong gitudlo sa mga saksi nga kabanay ang mga suspek hinungdan nga napusasan.
Si Entero, nahinabi sa Superbalita Cebu, nagkanayon nga alas 7:00 sa gabii sa Biyernes, Enero 27, manan-aw unta sila og concert sa Barangay Balud apan sayo pa hinungdan nga nag-estambay lang una sila.
Matud ni Entero, ang iyang selpon maoy gigamit sa 14 anyos nga higala sa pag-communicate sa babaye nga nasuod niya bisan duha pa ka adlaw silang nagkaila sa inilang social media platform.
Gibutyag ni Entero nga ni-text ang babaye kang Mateo nga paadtuon sa ilang panimalay human siya lang ang nabilin, walay laing tawo.
Sumala ni Entero, nagmotorsiklo sila ni Mateo ug pag-abot sa panimalay ni Juliana, nag-istorya og kadali ang duha diha sa gawas, duol sa pultahan.
Dugang ni Entero, wala magdugay nag-inukubay og halok silang Juliana ug Mateo ug nisunod ang paghilawas sa duha.
“Akong gipasagdahan silang duha nga diha ra ko sa kilid sa panimalay,” asoy ni Entero.
“Ana man si Mateo nga ikaw na pud JanJan. Nakalitan ko, (ingon ko) sure diha uy di mi uyab lain kaayo. Pero si Juliana nga nisulti nga apil diri aron di ka manabi,” asoy ni Entero.
Tungod niini, dali siyang nipuli kang Mateo sa pagkabayo sa babaye.
Ug human niya, asoy ni Entero, nagdali siya sa pag-ilis aron molakaw apan si Mateo kondisyon pa nga mousab sa iyang gihimo.
“Ako giingan si Mateo nga adto nata. Naunsa man ni- second round pa man hinuon siya, naabtan sa kabanay,” sumala ni Entero.
Gitabangan sa pagkulata si Mateo sa kabanay samtang, si Entero nakadagan ug nakasakay sa motorsiklo nga gi-park sa unahan.
Apan wala magdugay, naabot sab ang mga pulis hinungdan nga naposasan ang duha.
Giangkon ni Entero nga nahilabtan niya ang babaye apan, dason niya, wa niya kini lugosa.
Mangayo siya og pasaylo sa ginikanan sa babaye ug kabanay.
Andam sab siyang mangasawa ug mopaeskwela kang Juliana aron di mapriso.
“Ako giingnan akong ginikanan nga tubagon nako tanan kaso,” matud ni Entero.
Ang kapulisan nagpaabot sa kabanay sa pormal nga pagpasaka sa tukmang kaso batok sa duha ka mga suspek