Gibuntog sa host Boston Celtics ang Los Angeles Lakers pinaagi sa overtime, 125-121, sa usa ka kombati nga nasagulan og kontrobersya kagahapon, Enero 29, 2023 (PH time), sa National Basketball Association (NBA).
Dumadaog unta ang Lakers dihang nakalusot ug naka-layup ang ilang lider nga si LeBron James sa dayong paghuman sa regulation period apan wala nasulod ang bola hinungdan nga napugos ang overtime.
Nireklamo ang kanhi four-time MVP nga adunay nag-foul kaniya niadtong gutloa apan wala’y tawag ang mga referee.
“The best player on earth can’t get a call. It’s amazing,” matod ni Lakers coach Darvin Ham.
“As much as you try not to put it on the officiating, it’s becoming increasingly difficult.”
Ang kauban ni James nga si Patrick Beverly nikuha sa courtside camera sa tinguha nga iyang ipakita sa mga referee ang video replay apan wala natuman ang iyang intensyon ug natawagan pa hinuon siya og technical foul.
Napasulod ni All-Star forward Jayson Tatum ang technical freethrow nga maoy naghatag sa Celtics og 106-105 nga labaw pagsugod sa overtime ug human niini, wala na nakaposte og labaw ang Lakers hangtod na sa katapusang gutlo.
Ang Celtics, nga ningpahugot sa ilang paggunit sa overall leadership bitbit ang 36-15 nga rekord, gipangulohan ni Jaylen Brown pinaagi sa iyang 37 puntos lakip na niini ang kompletong three-point play sa nahabiling 4.1 segundos sa regulation.
Si Tatum niamot og 30 puntos ug 11 ka rebounds alang sa Celtics samtang nihatag og 26 puntos si Malcolm Brogdon.
Ang Lakers, nga natagak sa 23-27 nga rekord, gipangulohan ni James pinaagi sa iyang 41 puntos, nitampo og 16 puntos si Anthony Davis samtang nitunol og 15 puntos si Beverly.
“I don’t understand. I don’t understand what we’re doing, and I watch basketball every single day,” batbat ni James.
“I watch games every single day and I don’t see it happening to nobody else. It’s just weird.”
Grabe ka kulbahinam ang duwa diin sulod sa 19 ka mga higayon nga nagpuli-puli paggunit sa labaw ang duha ka mga kampo ug 15 ka mga higayon nga nagtabla ang kombati. / AP