Human sa subsub nga mga operation batok sa mga pinangita sa balaod ug pagpatuman sa bag-ong estratehiya sa anti-criminality operation nga mao ang Public Safety Analysis, upat ka mga most wanted person nadakpan sa Police Regional Office 7 (PRO) 7 sa Enero 27, 2023.
Ang hiniusang pwersa sa Criminal Investigation and Detection Group Visayas Field Unit 7 uban sa Lapu-Lapu City Police Office ug Regional Intelligence Unit 7 ni-serve sa warrant of arrest ni Justine Villamor, alyas Danin, sa kasong frustrated murder sa alas 7:55 sa Biyernes sa buntag, Enero 27, 2023, sa Brgy. Mabolo dakbayan sa Sugbo.
Si Villamor nabutang sa number 4 most wanted person sa provincial level.
Ang warrant of arrest giluwatan ni Branch 20 Judge Leah Iligan Geraldez sa Regional Trial Court (RTC) sa dakbayan sa Sugbo nga dunay P200,000 nga piyansa alang sa temporaryong kagawasan.
Samtang nasikop usab ang usa ka aircon scraper nga nabutang sa number 4 nga pinangita sa CIDG Mandaue Field Unit ug City Mobile Force Company sa Cebu City Police Office (CCPO) sa kasong frustrated murder.
Ang akusado giila nga si Archie Catipay, 20, kinsa nadakpan sa APM Mall sa Barangay Mabolo, dakbayan sa Sugbo.
Ang Mabolo Police Station ni-serve usab og warrant og arrest batok sa akusado nga si Melvin Pacaldo Madrid, alyas Muklo, 36, sa Sitio Banilad, Brgy. Bonbon, Dakbayan sa Sugbo sa alas 2:15 sa Biyernes sa udto.
Si Madrid dunay pending warrant of arrest sa kasong anti-carnapping nga giluwatan ni Judge Yvette Christine Rosario Labrador Soleng sa Branch 18 sa RTC sa dakbayan sa Sugbo.
Dunay gitugot nga piyansa nga P180,000 alang sa iyang temporaryong kagawasan.
Pagka alas 4:30 sa hapon sa maong adlaw, si Teodolo Centinales Pogoy, alyas Dolong, lumad nga taga Calatrava, Carmen, Bohol nga kasamtangan nga nagpuyo sa Purok Kawayan, Barangay Magnaga, Davao de Oro, nadakpan usab sa hiniusang pwersa sa PIU sa Davao de Oro Police Provincial Office ug Bohol PPO.
Ang akusado adunay pending warrant of arrest sa kasong murder ug kalapasan sa Comprehensive Law on Firearms and Ammunition.
Si Pogoy nabutang sa number 4 most wanted sa probinsya sa Davao de Oro ug gi turned over na sa Pantukan Municipal police station sa maong probinsya aron ipakita sa korte nga nag isyu sa iyang warrant of arrest.
Matud ni Police Brigadier General Jerry Bearis, hepe sa Police Regional Office 7, nga ang pagkasikop sa upat ka mga most wanted nga nag tago-tago sa kamot sa balaod resulta sa iyang mando nga ipatuman ang bag-ong estratehiya batok krimen nga maoy gihimo sa Israel pinasikad sa Science ug analytics ug Public Safety Analysis nga epektibo sa pagpuhag sa kriminalidad.
“The capability enhancement of police on investigation and analysis of criminal databases delivers a remarkable outcome bringing most wanted persons into justice,” matud ni Bearis.