Giduso sa Cebu City Government ang paggamit sa online payment system sa tanang mga merkado publiko, opisina sa gobyerno, ug pampublikong transportasyon.
Si Bise Mayor Raymond Alvin Garcia niduso og ordinansa niadtong Miyerkules, Enero 25, 2023, nga nag-awhag sa tanang business establishments ug lokal nga transportasyon sa Siyudad sa pagsagop sa “QR PH Digital Payments” ug himuon kini nga magamit sa mga kustomer niini.
Ang QR PH gilusad niadtong Nob. 2019 ug nagsilbi nga national Quick Response code standard nga nagsilbi nga instrumento sa cost-efficient digital payments, mabasa sa usa ka bahin sa ordinansa.
Ang Department of the Interior and Local Government ug Banko Sentral ng Pilipinas nilusad dayon sa “Paleng-QR Ph Plus” nga programa pinaagi sa pagpasiugda sa financial inclusion ug cashless transactions sa nasud.
Ang gisugyot nga ordinansahon ni Garcia naglangkob sa tanang public market vendors, tanang pampublikong transportasyon nga nag-agi sa mga rota sa siyudad, ug tanang tindahan ug business establishments lakip na ang “sari-sari” stores ug ambulant vendors.
Ang ordinansa maghatag og pagtugot kang Mayor Michael Rama nga makasulod ug makapirma og memorandum of agreement sa mga piniling qualified financial service providers (FSPs) alang sa pagpatuman sa programa.
Ang mga FSP magdasig sa pag-implementar sa mga espesyal nga programa o deal nga makadani sa target nga mga partisipante sa pag-abli sa transaction account ug paggamit sa QR code digital payment.
Ang City Government pinaagi sa Department of Information and Communication mopahigayon usab sa paghatag og libreng WiFi connectivity sa publiko ug komunidad nga mga merkado ug mga terminal sa pasahero.
Ang mga kampanya sa impormasyon, edukasyon, ug komunikasyon ipahigayon sa Siyudad aron sa pagpalambo ug pagpadayon sa programa pinaagi sa paghatag og financial literacy programs, financial services para sa micro ug small enterprises, ug financial consumer protection.
Makadawat usab og insentibo ang mga negusyante o public transport operators ubos sa gisugyot nga lakang kon ilang gamiton ang Paleng-QR program.
“A one percent discount shall be granted on fees, licenses, permits, or business taxes imposed by the Cebu City Government with the establishment, operation, and maintenance of the market stall or tricycle operation for the first two years of the implementation of the Paleng-QR Ph Plus program,” mabasa sa tipik sa ordinansahon. (IRT)