P6.7M drugas nasakmit sa 24 oras sa PNP, PDEA

GISUGO RA? Kon tinuod man nga gisugo ra siya pagpalit, pwerteng mahay ni Asher Bacacao, 29,human siya naapil pagkasikop sa buy-bust sa Sityo Luna, Barangay Lagtang, Dakbayan sa Talisay nga gilusad sa Police Drug Enforcement Group (PDEG) Visayas-Special Operations Unit, sa Sabado sa gabii, Enero 28, 2023. Usa lang siya sa mga nadakpan sa nagkadaiyang mga operasyon. . / BENJIE B. TALISIC
GISUGO RA? Kon tinuod man nga gisugo ra siya pagpalit, pwerteng mahay ni Asher Bacacao, 29,human siya naapil pagkasikop sa buy-bust sa Sityo Luna, Barangay Lagtang, Dakbayan sa Talisay nga gilusad sa Police Drug Enforcement Group (PDEG) Visayas-Special Operations Unit, sa Sabado sa gabii, Enero 28, 2023. Usa lang siya sa mga nadakpan sa nagkadaiyang mga operasyon. . / BENJIE B. TALISIC

Mokabat sa labing minus P6.7 milyunes nga balor sa gituohang shabu ang nasakmit sa Police Regional Office (PRO-7) ug Philippine Drug Enforcement Agency (PDEA-7) sulod sa 24 oras sa managlahing mga operasyon sa Metro Cebu.

Ang labing daku og nasakmit mao ang Lapu-Lapu City Police Office (LCPO) nga nakakuha og labing minos tunga sa kilo sa gituohang shabu nga dunay balor nga P3.5 milyunes.

Ang buy-bust gipahigayon sa sityo Mustang, Brgy. Pusok, dakbayan sa Lapu-Lapu niadtong Biyernes.

Matud ni Lapu-Lapu City Mayor Junard “Ahong” Chan nga katumanan kini sa iyang tinguha nga mahimong drug-free city ang Lapu-Lapu.

Mando ni Chan ngadto kang Police Colonel Elmer Lim, pangu sa LCPO, nga pahugtan pa sa kapulisan ang mga entry point sa siyudad aron dili makasulod ang mga kontrabando sa isla.

“As I said nga wala kalusot sa atoa so buot pasabot niana nga dili lang sa neighboring nga cities and municipalities including other places gikan sa kaulohan, gikan sa Leyte mosulod diri. Mao na nga ang atong direktiba sa kapulisan nga kon mahimo let’s make our Lapu-Lapu City as a drug-free,” matud ni Chan.

SHABU, MARIJUANA

Di momenos P1.7 milyunes nga balor sa gituohang shabu ug marijuana ang nasakmit sa kapulisan nunot sa sunod-sunod nga buy-bust niadto gihapong Enero 27, 2023.

Ang Toledo City police station ug Regional Intelligence Unit 7 nakasakmit og 142 gramos sa gituohang shabu nga dunay standard drug price nga P965,000 sa suspek nga giilang si Edgar Mahinay Ypon, 45, taga Purok 1, Brgy. Santo Niño, alas 8:30 sa Biyernes sa gabii.

Pagka alas 9:25 sa gabii, gibanabana usa ka kilo sa dahon sa marijuana nga mobalor og P120,000 ang nasakmit sa Carbon police station sa buy-bust sa sa dalan El Filibusterismo, Brgy. Ermita, Cebu City.

Ang suspek giila nga si John Paul Carmelotes Labiste, alyas Bogz, 27, taga Sitio Rotola, Brgy. Guadalupe dakbayan sa Sugbo.

Samtang ang mga sakop sa City Drug Enforcement Unit sa Cebu City Police Office naka dakop usab og laing suspetsadong durugista sa Brgy. Guadalupe.

Ang suspek giila nga si Alfonso Gultiano Luna, alyas Alko, 33, taga Sitio Laguna Brgy. Bulacao ning siyudad. Siya nakuhaan og shabu nga dunay balor nga P748,000.

TALISAY

Suspetsadong mamarukay og drugas sa Sityo Luna, Brgy, Lagtang, Dakbayan sa Talisay nadakpan sa buy-bust sa PDEG Special Operations Unit sa Visayas sa Sabado sa gabii, Enero 28.

Nasikop sa grupo ni Police Major Jefferson Bandilan, team leader, mao si Ritchie Villaraso, 43, ug giingong mamalitay nga si Asher Bacacao, 29.

Nasakmit gikan kanila ang P102,000 nga balor sa gituohang shabu.

Matud ni Bacacao nga pwerte niyang pagmahay kay igo ra siyang gisugo og palit og shabu balor og P300.

PDEA

Samtang nadakpan sa PDEA 7 sa buy-bust sa Sabado sa gabii sa Brgy. Estaca, Compostela ang suspetsadong drug pusher nga si Jason L. Matugas, kinsa nasakmitan og shabu nga 55 gramos nga dunay balor nga P353,600.

Paglabay sa usa ka oras, nakasakmit usab sila og 175 gramos sa gituohang shabu nga balor og P1,190,000 gikan sa suspetsadong durugistang giilang si Bryan B. Pepito sa buy-bust sa Brgy. Cotcot, Liloan.

Ang mga suspek pasakaan og kasong kalapasan sa Republic Act 9165 kun Comprehensive Dangerous Drugs Act of 2002.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph