DAKO ang papel sa mga ginikanan ug bisan sa mga guardians sa mga bata diha sa paghulma og maayong ugma niini ug malayo sa paghimo sa bisan unsang krimen sa komunidad.
Kini ang gibutyag sa Women and Children's Protection Desk (WCPD) pinaagi sa Davao City Police Office (DCPO) human nga dunay pito ka mga menor de edad nga na-rescue sa kapulisan sa Mobile Patrol Group kay gisulod ang usa ka siradong Chinese restaurant niadtong Biyernes sa buntag, Enero 27, 2023, didto sa F. Torres Street, Davao City.
Giingon sa DCPO nga ang mga Children in Conflict with the Law (CICL) sagad naggikan sa nabungkag nga pamilya kay napasagdan ug nahimong out-of-school youth (OSY).
Sumala ni DCPO spokesperson Police Major Catherine dela Rey nga ang pinakataas sa datus mao ang kalambigitan sa Republic Act (RA) 9165 kun Comprehensive Dangerous Drugs Act of 2002 nga gigamit sa mga hamtong sa mga kalihokan sa druga.
"The highest recorded incident is RA 9165, most of the CICLs were utilized by adults in drugs activities," sulti ni Dela Rey.
Dugang sa opisyal nga sagad mga lalaki ang makahimo sa krimen kinsa nag-edad og 15-anyos ngadto na sa 17-anyos.
Sa inisyal nga datus nga gipagula sa WCPD-DCPO sa ulahing kuwarter sa tuig 2022, natala nila ang usa ka insidente sa kasong Attempted Murder, duha sa Rape, usa ang Trespassing, usa ang sa Carnapping incident, usa ang sa Illegal Possession of Firearms ug 11 ang sa RA 9165 kun illegal nga druga.
Giingon ni Dela Rey nga ang mga na-rescue nga mga menor de edad gina-refer kini sa PNP ngadto sa Bahay Pag-Asa human sa proseso sa Quick Response Team for Children's Concerns (QRTCC) sa City Social Services and Development Office (CSWDO).
"Kini atong interventions ug assessment nga himoon, but if in case sama aning mga ginagmay nga dili criminal offense, mopahigayon tag advise ug talks sa parents, then paulion na ang bata," tipik sa sulti ni Dela Rey.