NAHIMONG away ang gihimong pagpamisbis og bulak sa usa ka biyuda human nga mialisngaw ang kaangso niini ug gikasuko sa iyang silingan didto sa lungsod sa Nabunturan sayo sa buntag niadtong Sabado, Enero 28, 2023.
Kini ang gibutyag sa usa ka Felicidad, 48, kinsa nagsulti nga ang iyang kumare nga si Andrea, 46, labihang sukoa dihang maoy misugat sa pagmata sayong buntag ang baho nga angso sa ihi sa tawo.
Matud pa nga sa dihang gisusi ni Andrea maoy iyang nakit-an ang silingan nga si Conception, 50, nga namisbis og mga bulak sa nataran sa balay nga sa matag bisbis niini moalisngaw ang kabaho sa angso gumikan kay ang tubig, sinagolan og ihi.
Sumala pa nga gikompronta ni Andrea si Conception apan giingon nga nasuko ug namulong nga "ayaw pagbuot kay akong patambukon ning akong mga bulak".
Hangtud nga miabot sa punto nga parehong tag-as na ang tingog sa duruha ug giingong gisabligan sa biyuda og ihi nga gibisbis sa mga bulak ang nagyawyaw nga si Andrea. Tungod sa kasuko ni Andrea, mipunit sab siya og planggana ug gilabay ngadto kang Conception.
Hinuon, gitug-an ni Felicidad nga wa na miabot sa barangay ang away sa duruha human nga mipataliwa ang bana ni Andrea, lakip na ang ugangan niini ug gihusay ang duruha nga misampot sa ilang pagpinasayloay sa usag-usa.