NA-OBSERBAHAN sa mga kawani sa Community Environment and Natural Resources Office (Cenro) sa Department of Environment and Natural Resources (DENR) sa Tacurong City ang nagkadaiyang klase sa Asian waterbird sa Baras Bird Sanctuary ug Lake Buluan Natural Biotic Area sa Lutayan, Sultan Kudarat.
Lakip niini mao ang black-crowned night Heron, Chinese Egret, Cattle Egret, ug Brahminy kite.
Kini subay sa pahayag ni Cenro Officer Badjury Mustapha human ang ilang 2 ka adlaw nga Asian Waterbird Census.
Matud ni Mustapha nga ang monitoring nagtumong aron nga masubay ang mga langgam sa wetlands.
Samtang sa Sarangani, ang Provincial Environment and Natural Resources Office (Penro) nagpahigayon sab og monitoring sa walo ka mga wetlands.
Sumala ni Penro Officer Maria Elvira Lumayag nga ilang gibisita ang mga wetlands (kalamakan) sa mga barangay sa Kawas sa Alabel, Badtasan sa Kiamba, ug Old Poblacion sa Maitum.
Dugang ni Lumayag nga ilang nakita ang Cinnamon Bittern, Black-winged Stilt, Whimbrel, Common Sandpiper, Kentish Plover, Whiskered Tern, Lesser Frigatebird, Wandering Whistling Ducks, Curlew, ug Common Ringed-plover.
Giklaro ni Lumayag nga ang mga datus nga ilang nahipos makatabang sa pagpreserba o kaha magamit sa health monitoring sa mga wetlands.