DILI mag-bomb joke sa bisan asang pampublikong lugar.
Kini ang pahimangno sa awtoridad ngadto sa publiko human nga usa ka pasahero sa eroplano ang gidakop sa PNP Aviation Security Group sa Francisco Bangoy International Airport sa Davao City.
Sa report sa dxGM Super Radyo Davao, gidakop ang usa ka babayeng pasahero gabii niadtong Dominggo, Enero 29, 2023.
Subay sa impormasyon sa PNP Aviation Security Group, atol sa boarding process sa Cebu Pacific Air, usa ka pasahero nga padulong unta sa Manila ang kalit nga nag-bomb joke, rason nga daling nagtawag ang flight attendant og security.
Tungod sa panghitabo, gipanaug ang tanang pasahero sa Cebu Pacific Flight 5J-978 aron sutaon ang lugar diin pipila ka minuto, gideklara sa Explosive Ordnance Disposal (EOD)/K9 unit nga cleared ang tanang pasahero ug mga kargamento sa bisan unsang pabuto ug mga explosive device.
Samtang ang pasaherong nag-bomb joke gidala sa istasyon sa pulis sa Davao International Airport alang sa imbestigasyon.
Sa pagsuwat ning balita, ang maong babaye temporaryong gikustodiya sa Panacan Relocation Police Sub-Station kinsa mag-atubang og kasong paglapas sa Presidential Decree 1727 kun Anti-Bomb Joke Law. (Uban sa taho ni Isabel Mateo, GMA Super Radyo Davao)