LUYO sa sitwasiyon sa dagan sa trapiko sa Davao City, wala pa'y planong magpatuman og color coding ang Davao City Transport and Traffic Management Office (CTTMO).
Sumala sa hepe sa Davao (CTTMO) chief Dionisio Abude, dili sa tanang higayon makasinati og grabeng traffic ang siyudad.
Gipasabot ni Abude nga gawas na lang og dunay mga aberiya susama sa mga dalan nga dili maagian kay dunay mga nahitabong kakulian.
Dugang ni Abude nga dunay mga ginahimong proyekto ang gobyerno aron nga ma-solusyunan ang problema sa trapiko susama sa paghimo og mga bypass road, coastal road ug uban pang infrastructure projects ug ang nakatakdang pagpatuman sa transport modernization program nga High Priority Bus System (HPBS).
Giingon sab sa opisyal nga ugaling mahuman ug operational na ang mga maong proyekto, dili na problema ang traffic sa siyudad.
Apan sumala sa motorista nga si Darwin Refuerzo, taga Bago Gallera, Davao City nga ang nasinati nga trapik sa siyudad usa lamang ka timaan nga milambo ang dakbayan.
"Indication ni siya nga kita diri sa Davao City milambo," ingon ni Darwin kinsa midugang nga unta dalion ang mga road constructions.
Nagpasibaw sab sa iyang opinyon ang drayber sa Public Utility Jeepney (PUJ) nga si Gergorio Biscocho nga luoy kaayo ang mga drayber labi na og maipit na sa trapik kinsa wala pa kakuha sa boundary.
"Luoy kaayo, labi pa og kulang pang boundary, wala nay madala sa balay, naa gyod untay remedyo ang lokal nga gobyerno, sama pananglit kami sa asosasyon dunay mga regular nga subsidy," ingon sa 59-anyos nga drayber sa PUJ.
Hinuon sumala sa CTTMO, kining tanan pulos mga pagtuon, ug kung ilang masayran ang mas pabor pa kaayo nga remedyo, lagmit mohimo na sila sa susama nga paagi aron makunhoran lang ang sitwasiyon sa trapiko ning siyudad. (Uban sa taho sa Radyo Pilipinas)