Usa ang patay ug duha nangaangol human sa bangga sa motorsiklo ug truck, alas 8:30 sa buntag sa Lunes, Enero 30, 2023, sa national highway sa Barangay South Poblacion, lungsod sa San Fernando.

Si Neil Bryan L. Solayao, 25, ulitawo, taga Sitio Sampaguita, Brgy. Tinubdan, San Fernando, namatay diha-diha.

Nangaangol iyang duha ka mga manghud nga sila si Jay, 17, ug Alvin Rhey,19, kinsa nangalandig sa tambalanan sa Carcar City.

Gitanggong si Felix Taborada, 37, dunay kapuyo, taga Purok Tikarol, Brgy. Balud, San Fernando, drayber sa Isuzu truck.

Sa imbestigasyon nila ni Police Major Peter Naboye Jr., ang mga biktima padulong sa eskwelahan sakay sa motorsiklo.

Sa pag-abot sa kurbada sa nahisgutang lugar, ni-overtake sila sa laing sakyanan apan nikawat sa pikas lane hinungdan nga nabangga sa gikasugat nga Elf truck.

Ang drayber nga si Niel Bryan naligsan kay napasok sa ilawom sa truck.

Ang duha ka mga angkas gidali sa pagdala sa tambalanan human nakaangkog grabing kadaot sa kalawasan.