Pulis naunay sa armas, patay

Google map
Google map

Patay ang usa ka pulis human aksidenting naunay sa iyang service firearm samtang nanglimpiyo niini, alas 12:50 sa udto sa Dominggo, Enero 29, 2023, sa Sitio Lagang, Barangay Bolinawan, dakbayan sa Carcar.

Si Patrolman Efren Delos Reyes Jr., 34, minyo, nagpuyo sa nahisgutang lugar, sakop sa Talisay City Police Station, dead-on-arrival (DOA) sa Vicente Sotto Memorial Medical Center (VSMMC).

Si Police Lt. Col. Ardioleto Cabagnot, hepe sa Carcar City Police Station nga nahinabi sa Superbalita Cebu, nagkanayon nga naigo sa iyang kuto-kuto si Delos Reyes.

Sumala ni Cabagnot, nakadawat sila og tawag sa telepono nga dunay pulis nga nadala sa Cebu Provincial Hospital sa Carcar City nga aksidenting naunay sa iyang armas.

Si Cabagnot niingon nga ang asawa ni Delos Reyes nga si Jocelyn nibutyag nga diha siya sa ilang sala sa panimalay ug kalit nga nabati ang usa ka sipang buto sa armas sa ilang guest room.

Ang biktima nga pulis nisinggit pa kini nga nangayo’g panabang.

Sa pagsusi ni Jocelyn, ingon man sa ilang amahan, nagbuy-od si Delos Reyes nga nagkadugo.

Gidali nila sa pagdala sa tambalanan sa Carcar, apan gumikan kay delikado ang iyang samad, gibalhin kini sa Vicente Sotto Memorial Medical Center, apan patay nang niabot.

Gibutyag ni Cabagnot nga nanglimpiyo ang biktima sa iyang service firearm.

Gibutyag niya nga dunay niungot nga bala sa armas sa pulis hinungdan nga giayo sa biktima.

Apan aksidente kining nibuto nga nakaigo sa iyang kuto-kuto.

“Aksidenti gyud walay foul play, nakasinggit pa gani siyag panabang sa iyang asawa, papa, nga dalhon sa tambalanan,” dugang ni Cabagnot

Giklaro ni Cabagnot nga disgrasya ang nahitabo nga wala magdahom ang biktima nga mobuto ang armas dihang gikuha ang bala nga niungot.

Gawas niini makita sab ang kabhang sa bala nga niungot. Gisugyot nila sa ka kabanay nga ipaubos sa autopsy ang lawas.

Ang asawa nibutyag nga sa panahon nga off duty iyang bana, adto kini matulog sa ilang guest room ug manglimpiyo sa iyang armas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph