Kapin na sa P1 bilyon ang nakolekta sa Cebu City Government usa ka adlaw sa dili pa matapos ang pagbayad sa mga business owner sa ilang buhis nga walay penalty ug surcharge.
Si City Treasurer Mare Vae “Ivy” Fernandez- Reyes sa City Treasurer’s Office (CTO) sa interbyu sa Superbalita Cebu sa Enero 30, 2023, nagkanayon nga P1.253 bilyunes na ang nakolekta nga business tax ug laing P249 milyunes ang nakolekta sa real property tax gikan sa real properties sa dakbayan sa Sugbo nga nasulod sa kaban sa gobiyerno.
Sa 21 ka adlaw nga pagpangolekta sa CTO gikan sa mga business establishment owner, niadtong Enero 20 ang labing dako nga buhis nga ilang nakolekta kay niabot og P326.2 milyunes.
Samtang ang labing ubos sa Enero 7 nga aduna lay P3.9 milyunes.
Gipasabot ni Reyes nga nibaha ang gidaghanon sa mga magbubuhis nga nanag-iya og balay patigayon sa maong adlaw sanglit sila nagtuo nga niadtong Enero 20 ang deadline sa pag-renew sa ilang Mayor’s Business Permit nga walay penalty ug surcharge.
Ang labing taas nga opisyal sa CTO nagkanayon nga sugod sa Pebrero 1, ang mga business establishment nga mag-renew sa ilang business permit aduna nay 2% nga penalty kada buwan ug 25% surcharge samtang ang pagbayad sa RPT hangtod pa sa Marso.
Karong adlawa, Enero 31, mao ang katapusang adlaw sa collection sa business tax nga walay penalty sa SM City Cebu ug Robinsons Galleria de Cebu.
Gilauman ni Reyes nga modagsa pa ang gidaghanon sa mga gustong magpa-renew sa ilang business permit karong adlawa sa duha ka renewal sites sa Cebu City.
Ang Dakbayan adunay dul-an 40,000 ka mga business establishment nga maoy tinubdan sa business tax sa City Hall.
Ang City Government pinaagi sa City Council niaprobar sa P50 bilyunes nga annual budget sa 2023.
Kini maoy tinguhaon sa CTO nga makolekta aron adunay magasto alang sa mga programa ug proyekto sa administrasyon ni Mayor Michael Rama.