GITUOHANG dumot sa pamilya ang hinungdan sa mga awtoridad sa pag-ambush sa barangay kapitan ug asawa niini alas 5:30 sa hapon, Lunes, Enero 30, Parang, sa probinsiya sa Maguindanao del Norte.
Naila ang mga napatay nga sila Abubacar Abdul, kapitan sa Barangay Polloc sa nahisgutang lungsod ug asawa niini nga si Baisa Abdul.
Sumala kang Parang Chief of Police, Major Christopher Cabugwang, nga sakay ang mga biktima sa kolor puti nga Toyota Hilux pickup nga gimaneho sa kapitan mismo sa Sitio Timbangan, Brgy Sarmiento, Parang.
Apan kalit lang nga mibutho sa daplin sa dalan ang wala mailhing mga armadong tawo ug gipamusil sila.
Nahulog sa kanal ang gisakyan nga pickup sa magtiayon kilid sa national highway.
Abtik sab nga miikyas ang mga suspek sakay sa duha ka motorsiklo ug kotse.
Mga biktima daling gisapupo sa mga pulis ug gidala ngadto sa Cotabato Regional and Medical Center (CRMC) sa Cotabato City apan gideklara ang magtiayon nga dead on arrival human makaangkon og daghang samad pinusilan sa lawas.
Kapulisan sa Parang Municipal Police Station padayon pang nagsusi sa hitabo aron nga matumbok ang mga nagpaluyo sa krimen.